პარტნიორი ქვეყანა მუქარის ტონით ელაპარაკება საქართველოს. ის დრო დამთავრდა, როცა საქართველო მუქარის ტონს აიტანს, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.
მაჭარაშვილმა კომენტარი გააკეთა აშშ-ის სახელმწიფო დეპარტამენტის პრესსპიკერის მოადგილის, ვედანტ პატელისგანცხადებაზე, რომელშიც აღნიშნულია: „ჩვენ მკაფიოდ გამოვხატეთ შეშფოთება რუსეთთან პირდაპირი ფრენების საკითხზე. ყურადღებით გავაგრძელებთ დაკვირვებას და საჭიროების შემთხვევაში, დამატებით ნაბიჯებს გადავდგამთ“.
მისი თქმით, საქართველოს საზოგადოება ხედავს, რაშიც არის საქმე.
„ხედავთ, როგორი დამოკიდებულება არსებობს? – პარტნიორი ქვეყანა მუქარის ტონით ელაპარაკება საქართველოს მაშინ, როცა ოკუპანტმა ქვეყანამ ცალმხრივად მიიღო გადაწყვეტილება, რომელზეც თავად ამერიკა ეუბნებოდა რუსეთს, საქართველოში ფრენები აღადგინეო. ეს არის ზუსტად ანტიამერიკული განცხადება. რა გგონიათ, საქართველოს საზოგადოება ვერ ხვდება, რაშია საქმე? – შე დალოცვილო, მეუბნები, რომ პარტნიორი ხარ, რუსეთზე მეტად ჩემზე ზრუნავ და ამ დროს, რუსეთმა ჩვენი მოსახლეობა 2019 წელს დაასანქცირა და თვითონ ეუბნებოდნენ აღადგინეო. ახლა ცალმხრივად მოხსნა, რაშიც ჩვენ არ ვმონაწილეობდით და მუქარის ტონი მოდის ამერიკის შეერთებული შტატებიდან. ამერიკაში არსებობენ ძალები, რომლებიც პარტნიორულ ურთიერთობას მაინც პატივს სცემენ და ამას დაველოდებით. ის დრო დამთავრდა, როცა საქართველო მუქარის ტონს აიტანს“, – განუცხადა გურამ მაჭარაშვილმა ჟურნალისტებს.