მთელი დასავლური საზოგადოება დაშორდა რუსეთს და მიგვაჩნია, რომ ახლა რუსეთთან ურთიერთობის გააქტიურების დრო არ არის, – ამის შესახებ აშშ-ის სახელმწიფო დეპარტამენტის პრესსპიკერის მოადგილემ, ვედანტ პატელმა საქართველოსა და რუსეთს შორის პირდაპირი ფრენების აღდგენასთან დაკავშირებით განაცხადა.
„თუ რუსეთსა და საქართველოს შორის პირდაპირი ფრენები განხორციელდება, ეს შემაშფოთებელი იქნება არა მხოლოდ შეერთებული შტატებისა და დასავლეთის სხვა ქვეყნებისთვის, არამედ ასევე კომპანიებისთვის, რომლებიც შესაძლოა საქართველოს აეროპორტიდან მუშაობენ, თუ ისინი იმ თვითმფრინავებს მოემსახურებიან, რომლებიც იმპორტისა და ექსპორტის კონტროლს ექვემდებარებიან, – განაცხადა ვედანტ პატელმა.
როგორც მან ჟურნალისტის შეკითხვის პასუხად განაცხადა, დაკვირვებას გააგრძელებენ და საჭიროების შემთხვევაში დამატებით ნაბიჯებს გადადგამენ.
„ძალიან მკაფიოდ გამოვხატეთ ჩვენი შეშფოთება ამ საკითხის მიმართ. მკაფიოდ ვისაუბრეთ, რომ ჩვენ ასევე გადავდგით ნაბიჯები, რათა აგვეკრძალა რუსული თვითმფრინავების ჩვენს საჰაერო სივრცეში შესვლა, ისევე როგორც ბევრმა დასავლურმა ქვეყანამ გააკეთა. ჩვენ ყურადღებით გავაგრძელებთ დაკვირვებას და საჭიროების შემთხვევაში გადავდგამთ დამატებით ნაბიჯებს, მაგრამ წინასწარ ვერაფერს გეტყვით“, – აღნიშნა ვედანტ პატელმა.
