„ერთიანი ნაციონალური მოძრაობის“ დეპუტატმა ანა წითლიძემ საქართველოს მწერალთა სახლში, „სასკოლო კვების პროგრამის დანერგვა საქართველოში“ პრეზენტაცია გამართა.
სკოლებში უფასო კვების შესახებ ვრცელი ანგარიში მოამზადა „ერთიანი ნაციონალური მოძრაობის“ საპარლამენტო ფრაქციამ, სადაც განხილულია საქართველოს საჯარო სკოლებში უფასო კვების პროგრამის დანერგვის აუცილებლობა და შეფასებულია ამ გამოწვევის მასშტაბები. ანგარიშში ასევე განხილულია წალენჯიხის მუნიციპალიტეტის მაგალითი, რომელიც ერთადერთი გამონაკლისია, სადაც საჯარო სკოლებში მსგავსი პრაქტიკა დაინერგა.
„სასკოლო კვების პროგრამის დანერგვა საქართველოში“ პრეზენტაცია გაიმართა საქართველოს მწერალთა სახლში NDI-ის ორგანიზებით, სადაც თემატური მომხსენებელი „ერთიანი ნაციოანლური მოძრაობის“ დეპუტატი ანა წითლიძე იყო. პრეზენტაციას ასევე ესწრებოდნენ სკოლის პედაგოგები და მშობლები.
„დღეს ჩვენ გვაქვს ჩვენი ფრაქციის ანგარიში, რომელიც ეხება უფასო კვების დანერგვას საჯარო სკოლებში და ეს არის ანგარიში/გეგმა, რომლის მიხედვითაც ჩვენ კონკრეტულ გამოსავალს და კონკრეტულ გზებს ვთავაზობთ ხელისუფლებას, თუ როგორ უნდა მოაგვაროს უფასო კვების პრობლემა სკოლებში. ბოლო კვლევებითაც ჩანს, რომ მდგომარეობა არის მძიმე, 35 პროცენტი UNICEF-ის კვლევის მიხედვით ბავშვები სკოლებში განიცდიან სრულ შიმშილს, 77 პროცენტი განიცდის ნაწილობრივ შიმშილს და ამ ფონზე არ შეიძლება, რომ განათლების სამინისტროს და საქართველოს ხელისუფლებას ჰქონდეს სხვა პრიორიტეტი, არ შეიძლება სკოლებში ბავშვები შიმშილობდნენ და ბიუროკრატიულ ხარჯებზე იხარჯებოდეს მილიონობით ლარი. ამიტომაც, დღეს ჩვენ ამ ანგარიშში კონკრეტულად არის მოცემული გზები, როგორ შეუძლია ხელისუფლებას მოაგვაროს „უფასო კვების“ პრობლემა სკოლებში, როგორ შეუძლია სწრაფად და ხარისხიანად დაგეგმოს ეს პროგრამა სკოლებში, რომ ჩვენს შვილებს საჯარო სკოლებში არ უწევდეთ შიმშილი,“- განაცხადა ანა წითლიძემ.
წალენჯიხის მერის, გია ხარჩილავას თქმით, წალენჯიხამ დაამტკიცა,რომ ყველაფერი შესაძლებელია იმ შემთხვევაში,როცა ბიუჯეტი არ არის პარტიული სალარო და ორიენტირებული მოსახლეობის საჭიროებებზე.
„კვლევებმა აჩვენა,რომ ყოველი მეოთხე ბავშვი შიმშილობს.ამაზე უფრო მწვავე საკითხი ,რასაც ცენტრალური და ადგილობრივი ხელისუფლება პირველ რიგში უნდა აყენებდნენ ანალოგი,ამაზე მწვავე არ არსებობს ამიტომ პრიორიტეტად დაისახა მუნიციპალიტეტმა ბავშვთა პირველკლასელთა კვების უზრუნველყოფის საპილოტე პროგრამა. პროგრამა მუშაობს ძალიან ეფექტურად და პირველკლასელები კვებით არიან უზრუნველყოფილნი.მინდა გითხრათ,რომ მას შემდეგ რაც ბაღში გარანტირებული კვება აქვს აღსაზრდელებს შემდეგ ისინი ეჩეხებიან რეალობას მიდიან პირველ კლასში ,სადაც მშობელს არ აქვს შესაძლებლობა სოციალური ფენიდან გამომდინარე ყოველდღიური საკვების ფული ის ოთხი ლარი გაატანოს ბავშვს,რაც იწვევს სასწავლო პროცესის ჩაშლას ბავშვის აქტიურობის თვალსაზრისით მშობლის დეპრესიას და ამ შემთხვევაში პროგრამა გულისხმობს,როგორც სოციალურ მხარდაჭერას ასევე ბავშვების ჯანმრთელობაზე ზრუნვას და სრულფასოვანი სასწავლო პროცესის უზრუნველყოფას.“ - განაცხადა წალენჯიხის მერმა, გია ხარჩილავამ.
