საკმაოდ მაღალი აქტივობით რომ ჩატარებულიყო არჩევნები, „ქართული ოცნება“, სულ მცირე, 60 პროცენტს იღებდა, - ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ 29 აპრილის არჩევნებზე საუბრისას განაცხადა.
მისი თქმით, 29 აპრილის არჩევნები არის პასუხი IRI-ის ფეიკზე.
„როდესაც საუბრობდნენ, თითქოს „ქართულ ოცნებას“ 19 პროცენტი ჰქონია, ეს ფეიკი ხომ შემოგვთავაზა საკმაოდ სერიოზულმა ორგანიზაციამ. ამ დროს ყველაზე მაღალი აქტივობით რომ ჩატარებულიყო არჩევნები, „ქართული ოცნებას“ სულ მცირე, 60 პროცენტს იღებდა. არ ყოფილა არც ერთი საარჩევნო ოლქი თუ უბანი, სადაც მაღალი ზრდა არ იყო ჩვენი შედეგების. მიდის ამომრჩეველი არჩევნებზე, სადაც „ქართულ ოცნებას“ არ ჰყავს კონკურენტი. მოტივაცია ხომ დაბალია მისვლის, ამ მიმართულებით, ამომრჩევლების რაოდენობა ზოგან 20 და მეტი პროცენტითაც კი გაიზარდა. ეს არის ყველაფერზე პასუხი იმ ფეიკზე, რომელიც „აიარაიმ“ შემოგვთავაზა. 2021 წლის არჩევნებზე რამდენი ხმაც მიიღო თითოეულ ოლქსა თუ უბანში „ქართულმა ოცნებამ“, დრამატულად გააუმჯობესა ყველა შემთხვევაში. უფრო მეტი მხარდამჭერი მივიდა საარჩევნო უბნებთან უკონკურენტო არჩევნებში“, – განაცხადა მდინარაძემ.
