გუშინდელი აქცია იყო საზოგადოების მიერ ორგანიზებული და ყველა ადამიანი არის საზოგადოების წევრი. კიდევ ერთხელ გამოჩნდა, რომ საზოგადოება თავისით იკრიბება და უფრო მეტად, ფართო მონაწილეობით გამოხატავს საკუთარ პოზიციას, ვიდრე ამას ახერხებს ყველა ოპოზიციური პარტია ერთად, სხვადასხვა საკითხთან დაკავშირებით, – ამის შესახებ საქართველოს პარლამენტის ვიცე-სპიკერმა, არჩილ თალაკვაძემ ჟურნალისტებს განუცხადა კითხვაზე, „რესპუბლიკის მოედანზე გუშინ აქციაზე საჯარო მოხელეები იყვნენ და რას ნიშნავს ეს“.
თალაკვაძის თქმით, ოპოზიციას უკვე ჰყავს ლიდერები, რომლებსაც აქციებიდან აგდებენ, ართმევენ მიკროფონს და მათი იქ დგომა საზოგადოებას მიუღებლად მიაჩნია.
„ეს არის პოლიტიკური ჩიხი, დისკრედიტაცია და ეს არის რადიკალური ოპოზიციის სტატუსი. მათ არ სიამოვნებთ არცერთი შეკრება, რომელსაც არ ჰქვია მათი სახელი და რა თქმა უნდა, ყოველთვის ცდილობენ, ეს დაუკავშირონ „ქართულ ოცნებას“. ეს მათთვის არის ძალიან დიდი კრახი, როდესაც საზოგადოება მათ გარეშე უფრო ფართო მანიფესტაციებს ატარებს და გამოხატავს საკუთარ აზრს მნიშვნელოვან საკითხებზე, მათ შორის ეროვნულ ინტერესებთან დაკავშირებით“, – განაცხადა არჩილ თალაკვაძემ.
