კონფერენცია არის ამერიკელ კონსერვატორთა კავშირის მიერ ორგანიზებული. გირჩევდით, აშშ-ის ელჩს ჰკითხოთ, არის თუ არა ეს ფაშისტური ორგანიზაცია, როგორც თქვენ უწოდებთ, – ამის შესახებ საქართველოს პარლამენტის თავმჯდომარე, შალვა პაპუაშვილმა ჟურნალისტებს კითხვის საპასუხოდ განუცხადა.
კერძოდ, კითხვა ეხებოდა უნგრეთში, კონსერვატიული პოლიტიკური მოქმედების კონფერენციას, რომელშიც მონაწილეობას მიიღებს საქართველოს პრემიერ-მინისტრი ირაკლი ღარიბაშვილი.
შალვა პაპუაშვილის თქმით, ევროკავშირის ყველა წევრ ქვეყანასთან მუშაობა მნიშვნელოვანია და ევროპელ კოლეგებთან კომუნიკაციისთვის მთავრობა ყველა ფორმატს იყენებს.
„რეიგანს, ბუშს, დონალდ ტრამპს უწოდებთ ფაშისტ პრეზიდენტებს? ოპოზიციისგან მოვისმინეთ შეფასებები, თითქოს ფაშისტურია, ანტიდასავლურია. გამოდის, რომ რეიგანი, ბუში და ტრამპი ანტიდასავლელები არიან. ამ კონფერენციის ისტორია, მისი პოზიციები თუ გაინტერესებთ, საქართველოში წარმოდგენილია აშშ-ის საელჩო და ვკითხოთ, რამდენად მიიჩნევს, რომ კონფერენცია ანტიდასავლურია, ფაშისტურია ან რაღაც სხვა ტერმინი თუ არსებობს. ეს არის სწორედ ამერიკელი კონსერვატორების მიერ ორგანიზებული ერთ-ერთი მნიშვნელოვანი ღონისძიება, სადაც მიწვეულია საქართველოს პრემიერ-მინისტრი. რა თქმა უნდა, ჩვენ ვიყენებთ ყველა ფორმატს და ფორუმს, რათა კომუნიკაცია გვქონდეს ევროპელ კოლეგებთან“, - განაცხადა შალვა პაპუაშვილმა.