ოპოზიციას რაიმე პრაგმატიზმი თუ აქვს, რიგგარეშე არჩევნები არაფერში სჭირდება, უარეს შედეგს მიიღებს, ვიდრე დღესაა, – განაცხადა „ქართული ოცნების“ წევრმა, განაცხადა ბექა დავითულიანმა.
„რა რიგგარეშე არჩევნები, ხვალ შუალედური არჩევნებია და არსად კანდიდატი არ ჰყავთ. რომელი რიგგარეშე არჩევნები ამ სიტუაციაში ან რისთვის? ოპოზიციასაც კი რაიმე პრაგმატიზმი თუ აქვს, რიგგარეშე არჩევნები თავისთვის არაფერში სჭირდება, უარეს შედეგს მიიღებს, ვიდრე დღესაა“, – განაცხადა ბექა დავითულიანმა.
დავითულიანს მიმართეს, შეეფასებინა ოპოზიციის ნაწილის განცხადება, რომლის მიხედვითაც, იმ შემთხვევაში მოითხოვენ რიგგარეშე არჩევნებს, თუ საქართველო კანდიდატის სტატუსს ვერ მიიღებს. ბექა დავითულიანის თქმით, ეს მეტყველებს ოპოზიციის სურვილზე, ქვეყანამ კანდიდატის სტატუსი ვერ მიიღოს.
„მათი მხრიდან ეს მეტყველებს სურვილზე, რომ ამ ქვეყანამ ვერ მიიღოს კანდიდატის სტატუსი და ეს თავიანთი მიზნებისთვის გამოიყენონ. იმედი მაქვს, ყველაფერი პირიქით მოხდება“, – აღნიშნა ბექა დავითულიანმა.
