ევროპული საქართველოს პოლიტსაბჭოს თავმჯდომარის, გიგი წერეთლის ინიციატივით, ეუთო-ს საპარლამენტო ასამბლეის ყოფილი პრეზიდენტები სამუშაო ვიზიტით უკრაინაში იმყოფებოდნენ.
გიგი წერეთელმა, ჟოაო სუარესმა (პორტუგალია) და პეტროს ეფთიმიუმ (საბერძნეთი) შეხვედრები გაიმართეს უკრაინის მთავრობის ვიცე-პრემიერ ოლგა სტეფანიშინასთან, პირველ ვიცე-სპიკერ ალექსანდრ კორნიენკოსთან, უმრავლესობის ლიდერ და ვით არახამიასთან, სხვა პოლიტიკური პარტიების და დიპლომატიური წრეების წარმომადგენლებთან.
წერეთელი აცხადებს, რომ შეხვედრების ძირითადი თემა იყო დღეს არსებული ვითარება უკრაინაში, საბრძოლო მოქმედებების ზონებში, მზადება კონტრშეტევისთვის, რომელიც ახლა უკრაინის ხელისუფლების და ხალხის უმნიშვნელოვანესი ამოცანაა. ასევე, უკრაინის ევროატლანიკური ინტეგრაციის საკითხები, და რამდენად შესაძლებელია, რომ კიდევ უფრო სწრაფი და ეფექტური გახდეს საერთაშორისო საზოგადოების დახმარება.
წერეთელი აღნიშნავს, უკრაინის ევროინტეგრაცია და უსაცრთხოების საერთაშორისო გარანტიები ნატო-ს წევრობის სახით, მის გამარჯვება ამ გაუმართლებელ ომში, პრაქტიკულად ნიშნავს იმასაც, რომ საქართველოს აქვს შანსი, ეს მიზნები გაცილებით სწრაფად შეასრულოს.
მისი თქმით, მნიშვნელოვანი და ემოციური იყო ბუჩაში ვიზიტი. დაათვალიერეს ის ადგილები, სადაც რუსეთის მიერ ეთნიკური წმენდა და უმძიმესი სამხედრო დანაშაულები განხორციელდა.
"გავესაუბრეთ დაზარალებულებს. აღმაფრთოვანებელია ამ ხალხის გამძლეობა, ბრძოლისუნარიანობა და ოპტიმიზმი - დღეს ,ბუჩაში , ნანგრევებისა და რუსული აგრესიის კვალი თითქმის აღარ ჩანს. ძალიან სწრაფად ხდება აღდგენითი სამუშაოები. ეს ხალხი მონდომებულია იბრძოლოს, თავისუფლება მოიპოვოს და განვითარებული, თანამედროვე ქვეყანა ააშენოს".- ამბობს გიგი წერეთელი.
გიგი წერეთელის თქმით, ასეთ ვითარებაში, როდესაც უკრაინას უპირობო თანადგომა სჭირდება, საქართველოს ხელისუფლებას აქვს ეროვნული ინტერესების უკიდურესად დამაზიანებელი პოზიცია უკრაინის ხელისუფლებასთან ურთიერთობაში, რუსეთისა და ბელარუსის სტილში.
"სამწუხარო ამბავია, რომ საქართველოს ხელისუფლებამ მოახერხა, რომ დღეს ის არ არის უკრაინის ხელისუფლებასთან ერთად მებრძოლი გამარჯვებისთვის და ამავე დროს , საქართველოს გამარჯვებისთვის და მისი მშვიდობიანი მომავლისთვის".- ამბობს წერეთელი
