ეს არის შესაძლებლობა საქართველოს ხელისუფლებისთვის, გამოიძიოს სასამართლოს სისტემაში არსებულ კორუფციასთან დაკავშირებული ბრალდებები, რომელიც ფართოდ იყო ცნობილი წლების განმავლობაში, – ამის შესახებ საქართველოში აშშ-ის ელჩმა, კელი დეგნანმა პარლამენტში სასამართლოსთან დაკავშირებით დროებითი საგამოძიებო კომისიის შექმნის საკითხზე ჟურნალისტებს განუცხადა.
„მსურს, ცხადად ვთქვა, რომ ამ საქმესთან დაკაშირებით შეცდომა არ არსებობს. აშშ-ს აქვს სრული ნდობა ვიზების აკრძალვის საფუძვლებთან მიმართებით ამ ოთხ ადამიანთან დაკავშირებით, კორუფციულ ქმედებებში ჩართულობის გამო. ვიზის აკრძალვამდე ჩვენ ჩავატარეთ ძალიან საფუძვლიანი მიმოხილვა და შევაგროვეთ ინფორმაცია, რომლის უმრავლესობა საჯაროდ იყო ხელმისაწვდომი. სახელმწიფო მდივანმა ბლინკენმა დაამტკიცა ვიზის აკრძალვა, რადგან ჩვენ გვაქვს სრული ნდობა ვიზის აკრძალვის საფუძვლებთან დაკაშირებით. როგორც ვთქვი, ეს არის შესაძლებლობა საქართველოს მთავრობისთვის, თავად გამოიძიოს ბრალდებები ადგილობრივი კანონმდებლობის შესაბამისად, საჯარო და სხვა სახის ინფორმაციის გათვალისწინებით. ასევე, არ არის შეცდომა აშშ-ის სასამართლოს პროგრამებში მონაწილეობასთან დაკავშირებით.
ეს პროგრამები ღიაა მოსამართლეებისთვის, რომლებიც კვალიფიციურები არიან, ვისაც აქვთ დრო მონაწილეობისთვის და რომლებიც სარგებელს მიიღებენ ამ პროგრამებით თავიანთ სასამართლო ოთახებში იდეების ჩამოტანით. ჩვენ არასდროს დაგვიბარებია მოსამართლეები და არც არაფერი მოგვითხოვია მათგან, ეს სრული სიცრუეა და არასწორად ინფორმირებული ადამიანებისგან ვრცელდება. ჩვენ გვაქვს ძალიან პოპულარული და წარმატებული გაცვლითი პროგრამები, რომელშიც ბევრმა ქართველმა მოსამართლემ მიიღო მონაწილეობა. უცნაურად ჩანს სოლიდარობის გამოცხადება იმ ქართველი მოსამართლეების მიმართ, რომელთა უმრავლესობა ძალიან პროფესიონალია, რომლებსაც სურთ, იმუშაონ კანონის შესაბამისად. ოთხი ადამიანის დაცვა, რომელთა კორუფციაში მონაწილეობის შესახებ სანდო ინფორმაცია არსებობს, არ არის სოლიდარობა პროფესიონალი მოსამართლეების მიმართ. ვიმედოვნებ, მთავრობა გამოიყენებს ამ შესაძლებლობას ბრალდებებთან დაკავშირებით გამოძიების ჩასატარებლად“, – განახადა კელი დეგნამა.
