„უმრავლესობამ უნდა შეძლოს, ოპოზიციასთან ერთად, ამ საკითხში თანამშრომლობა და საზოგადოებისთვის ჩვენება, რომ ამ მნიშვნელოვან საკითხზე ჩვენ შეგვიძლია ერთობლივად ვიმუშაოთ მიუხედავად იმისა, რომ ჩვენი შეფასებები სხვადასხვაა სასამართლო სისტემასთან დაკავშირებით. ამიტომ ყველაფერი გავაკეთოთ იმისთვის, რომ დღეს, განხილვის შემდეგ, კენჭისყრაზე დადგეს სასამართლო სისტემაში არსებული პრობლემების შესწავლისთვის საგამოძიებო კომისიის შექმნის საკითხი“, - განაცხადა პლენარულ სხდომაზე „რეფორმების ჯგუფის“ ხელმძღვანელმა, ხათუნა სამნიძემ.
როგორც მან აღნიშნა, საგამოძიებო კომისია უნდა შეიქმნას იმ მიზნით, რომ გაირკვეს თუ რა ხდებოდა სასამართლო სისტემაში წინა ხელისუფლების დროს და რასთან გვაქვს საქმე დღეს.
„დეკემბერში, ჩვენმა პოლიტიკურმა ჯგუფმა, მთელი პოლიტიკური სპექტრის სახელით, პარლამენტში დაარეგისტრირა საკითხი „საგამოძიებო კომისია სასამართლო სისტემაში არსებული პრობლემების შესწავლისთვის“. დღეს ეს თემა კიდევ უფრო აქტუალური გახდა იმ სანქციების შემდეგ, რომელიც ქვეყანამ მიიღო, როცა პერსონალურად დასანქცირდა სამი მოსამართლე და ერთი ყოფილი მოსამართლე. სახელმწიფოს მხრიდან ამაზე ადეკვატური პასუხი იმისათვის, რომ უკვე სანქციები მართლა და სინამდვილეში პერსონალურ სანქციებად იყოს აღქმული და არ დაზიანდეს ქვეყნის იმიჯი, იქნებოდა თუ საკანონმდებლო ორგანოში ერთობლივად შევქმნიდით საგამოძიებო კომისიას, ანუ ეს არის ქვეყნის ინტერესებიდან გამომდინარე გადასადგმელი ნაბიჯი და აქ არ უნდა იყოს „შენი თუ ჩემი დღის წესრიგი“ სალაპარაკო თემა“, - განაცხადა ხათუნა სამნიძემ.
