"მგონია, რომ ფაქტებში ვერ ერკვევა უკრაინის პრეზიდენტი", - ამის შესახებ "ქართული ოცნების" წევრმა მიხეილ სარჯველაძემ განაცხადა.
ის გამოეხმაურა ვოლოდიმირ ზელენსკის განცხადებას, რომელშიც უკრაინის პრეზიდემტი ამბობს, რომ მიხეილ სააკაშვილის სიცოცხლე ახლა დამოკიდებულია არა პოლიტიკურ, არა რაიმე პირადულ, არამედ სრულიად ეთიკურ გადაწყვეტილებაზე.
"მგონია, რომ ფაქტებში ვერ ერკვევა უკრაინის პრეზიდენტი, როდესაც ამ საკითხებზე კომენტარს აკეთებს. არ ვიცი, რამდენად განსწავლულია ის იურისპრუდენციაში, მაგრამ ფაქტია, რომ როდესაც ის იცლის ამ საკითხებზე, როგორც ჩანს, ის მიიჩნევს ამას მისთვის განსაკუთრებულად მნიშვნელოვნად, მისი ქვეყნისთვის განსაკუთრებულად მნიშვნელოვნად. მაგრამ, ალბათ, უმჯობესია, ასეთ დროს თვითონ გარემოებებშიც ჩაიხედონ. არ შეიძლება უბრალოდ ასე, ემოციების დონეზე, ან უბრალოდ პიარის შედეგად ჩამოყალიბებული ემპათიის გამო კეთდებოდეს ასეთი განცხადება, რომელიც, ევფემიზმი რომ გამოვიყენოთ, ვფიქრობ, გადაუმოწმებელია", - თქვა სარჯველაძემ.
