„ისრაელის სახლის“ ორგანიზებით, თბილისში, სასტუმრო „ბილტმორში“ დღეს, 15 აპრილს, 19.30 სთ-ზე ისრაელის სახელმწიფოს 75 წლისთავისადმი მიძღვნილი ღონისძიება გაიმართება.
ღონისძიებებში მონაწილეობის მიღების მიზნით, საქართველოში უკვე ჩამოვიდნენ ისრაელის ქნესეთის წევრები როგორც სამთავრობო კოალიციიდან, ასევე ოპოზიციის წამყვანი ფიგურები. დელეგაციაში არიან ქნესეთში საქართველოსთან მეგობრობის ჯგუფის ხელმძღვანელი, ეკონომიკის კომიტეტის თავმჯდომარე დავიდ ბიტანი, ოპოზიციიდან ყოფილი მინისტრი და ამჟამად ქნესეთის წევრი მიხაელ ბიტონი, ქნესეთის ყოფილი ვიცე-სპიკერი და საქართველოსთან მეგობრობის ჯგუფის ყოფილი ხელმძღვანელი ხილიკ ბარი.
დელეგაციის ვიზიტი დაიწყო ვარკეთილში ქართველი შინდლერების პარკის, მემორიალისა და ანა ფრანკის 30-მეტრიანი გამოსახულების მონახულებით და გაგრძელდება საქართველოს სხვადასხვა რეგიონში.
სოლიდარობის აქციის ფარგლებში, დაგეგმილია ისრაელის სახელმწიფოს 75 წლისთავისადმი ღონისძიება „ჰოლოკოსტიდან წარმატებამდე“, რომელზეც სიტყვით გამოვლენ საქართველოს პარლამენტის თავმჯდომარის მოადგილე ავთანდილ ენუქიძე, ისრაელის სახელმწიფოს პარლამენტთან მეგობრობის ჯგუფის ხელმძღვანელი გივი მიქანაძე. დამსწრე საზოგადოებას სიტყვით მიმართავენ, აგრეთვე, ისრაელის დელეგაციის წევრებიც.
ნაჩვენები იქნება 2-წუთიანი ფილმები ჰოლოკოსტსა და ისრაელის წარმატებებზე.
ღონისძიებაზე მოწვეული არიან, აგრეთვე, სხვა ოფიციალური პირები საქართველოდან, ისრაელელი ბიზნესმენები, ტურისტული კომპანიები, ებრაული ორგანიზაციები, კულტურისა და ხელოვნების ცნობილი მოღვაწეები, სტუდენტები და პროფესორ-მასწავლებლები.
„ისრაელის სახლის“ დამფუძნებლისა და ხელმძღვანელის, იციკ მოშეს თქმით, „ისრაელის სახლი“ უკვე 10 ქვეყანაში საქმიანობს, ხოლო საქართველოს მაგალითმა აჩვენა, რომ რეალური ისრაელის წარმოდგენა და სახალხო დიპლომატია მეორე მხარისთვის კავშირების ჩამოყალიბების რეალური ხიდი გახდა. ამაზე ქნესეთიდან ვიზიტების რაოდენობაც ადასტურებს.
დაგეგმილია ისრაელის დელეგაციის შეხვედრა საქართველოს პარლამენტში ისრაელთან მეგობრობის ჯგუფისა და სხვადასხვა კომიტეტის თავმჯდომარეებთან.
