პრემიერ-მინისტრის უზენაეს სასამართლოში ვიზიტმა სასამართლოს არაკეთილმოსურნეებს ერთგვარი ცივი შხაპი გადაასხა, - ამის შესახებ „იმედის“ ეთერში იუსტიციის უმაღლესი საბჭოს წევრმა მოსამართლემ, დიმიტრი გვრიტიშვილმა განაცხადა.
“შეიძლება, თამამად ითქვას, რომ დღეს პრემიერ-მინისტრის უზენაეს სასამართლოში ვიზიტმა სასამართლოს არაკეთილმოსურნეებს ერთგვარი ცივი შხაპი გადაასხა. ამ უპრეცედენტო, დაუსაბუთებელი გადაწყვეტილების, რომლითაც მოქმედი მოსამართლეები კორუფციის უმძიმესი ბრალდებით დასანქცირდნენ, მიზანი ერთი მხრივ იყო თითოეული მოსამართლის დაშანტაჟება. მეორე, ხელისუფლებისადმი გზავნილი იყო, რომ აი, გაემიჯნეთო. ამის ცალსახა ლუსტრაცია პრეზიდენტის ბრიფინგი იყო. პრეზიდენტმა ასეთი პოზიცია არჩია, რომ ვთქვათ, ჩვენს "ევროპულ მომავალს" ეს 4 ადამიანი შევწიროთო.
რაც შეეხება მთავრობასა და მთავრობის მეთაურს. ირაკლი ღარიბაშვილის დღევანდელმა ვიზიტმა და მის მიერ გამოხატულმა პოზიციამ სავსებით დაგვარწმუნა იმაში, რომ ამ უპრეცედენტო შეტევის პირობებში, დღეს სასამართლო ხელისუფლება მარტო არ არის და რომ საქართველოს აღმასრულებელ ხელისუფლებას, მისი ხელმძღვანელის სახითაც აბსოლუტურად ჯანსაღი პოზიცია უკავია, რაც სახელმწიფოს თანამდებობის პირველ პირს უნდა ეკავოს, რომელიც პასუხისმგებელია ქვეყნის სუვერენიტეტსა და უსაფრთხოების უზრუნველყოფაზე“, - განაცხადა გვრიტიშვილმა.
ირაკლი ღარიბაშვილმა საქართველოს უზენაესი სასამართლოსა და იუსტიციის უმაღლესი საბჭოს თავმჯდომარესთან, საბჭოს წევრებთან და მოსამართლეებთან შეხვედრის შემდეგ განაცხადა: „მე, როგორც მთავრობის მეთაური და მმართველი პარტიის წარმომადგენელი, ყველა მოსამართლეს სრულ მხარდაჭერას ვუცხადებ“.
