პრეზიდენტი გვეუბნება, რომ არც ვიმსახურებდით და არც ვიმსახურებთ, მაგრამ უნდა მივიღოთ კანდიდატის სტატუსი, ეს არის დამაზიანებელი რიტორიკა და, სამწუხაროდ, ამის გაგრძელებაა დანარჩენი ყველა მისი განცხადება, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ აშშ-ის მიერ დაწესებულ სანქციებზე სალომე ზურაბიშვილის განცხადებაზე საუბრისას თქვა.
მისი თქმით, სალომე ზურაბიშვილმა პარლამენტში მის მიერ დასმულ არცერთ შეკითხვას არ უაპსუხა.
„კითხვა მდგომარეობდა შემდეგში, ჩვენ რომ ჩავყოლოდით უკრაინის ხელისუფლების წარმომადგენლების, სხვა ადამიანების მოწოდებებს, მოხალისეებით და სამხედროებით სავსე ორი თვითმფრინავი უკრაინაში გაგვეშვა, სანქციები დაგვეწესებინა, საქართველოში რომ ვიღაცებს ერჩივნათ ბომბების წვიმა იმ წვას, სანქციებზე უარმა რომ გამოიწვია მათში, ამ ყველაფერს რომ წავყოლოდით, ომის თავიდან აცილება როგორ უნდა მომხდარიყო ან რისკების გადაზღვევა, რომელიც ამ ქვეყანას არ გაანადგურებდა. რატომ არ მიპასუხა, იცით? ამაზე პასუხი არ არსებობს. ამაზე პასუხი არის ის, რაც საქართველოს პრეზიდენტმა, ქალბატონმა სალომემ პარლამენტში ბრძანა? მან თქვა, რომ დღეს რეკომენდაციები სრულდება ფორმალურად, ეს იმას ნიშნავს, რომ არ იმსახურებს საქართველო კანდიდატის სტატუსს.
თითოეული ჩვენგანი, იცით, რას უნდა ვაკეთებდეთ? პრეზიდენტიდან დაწყებული თითოეული მოქალაქით დასრულებული, რომც არ სრულდებოდეს, ერთად უნდა ვიყოთ შეკრულები, ვამბობდეთ, რომ საქართველო დღეს ამ მოცემულობით, რა მოცემულობაც არ უნდა იყოს, იმსახურებს კანდიდატის სტატუსს. აღარ ვლაპარაკობ საქართველოს პრეზიდენტზე, ოპოზიციაზე, ვიცით, მათი მიზნები და გეგმები უკრაინიზაციის, ამ ქვეყანაში მეორე ფრონტის და ა.შ. პრეზიდენტი გვეუბნება, რომ არც ვიმსახურებდით და არც ვიმსახურებთ, მაგრამ უნდა მივიღოთ კანდიდატის სტატუსი, ეს არის დამაზიანებელი რიტორიკა და, სამწუხაროდ, ამის გაგრძელებაა დანარჩენი ყველა მისი განცხადება“, – განაცხადა მდინარაძემ.
