დღეს, 8 აპრილს, 20:00 საათზე, ევროპული საქართველო და პარტნიორი ორგანიზაციები პარლამენტთან ლაზარე გრიგორიადისის მხარდამჭერ აქციას გამართავენ.
ამომრჩეველთა განათლების საზოგადოების დირექტორის, თამარ ჩერგოლეიშვილის თქმით, საზოგადოების ღირესულმა ნაწილმა, არ უნდა დაუშვას, რომ პროტესტის წარმატებაზე შურისძიება ლაზარეზე გადატდეს.
"ვისაც ლიტერატურა უყვარს, ყველამ იცის ალბათ, რომ ყველაზე დიდი ბოროტებები სწორედ მართლმსაჯულების და კანონის სახელით ჩადენილა მსოფლიოში და სწორედ ასეთ ბოროტებასთან გვაქვს საქმე. როცა ჩვენ ყველამ მივიღეთ სიკეთე პროტესტით, მათ შორის, ქართული ოცნების პროდასავლურმა ამომრჩეველმა და ამ წარმატების გამო შურისძიება ტყდება ერთ 21 წლის ბიჭზე, რომელსაც შავრაზმული დემონიზაციის, შავრაზმული კამპანიის მეშვეობით აშავებენდა მის დისკრედიტაციას ცდილობენ. ჩვენ, ღირსეულმა საზოგადოებამ არ უნდა დავუშვათ, რომ ერთ ადამიანზე გადატყდეს ჯოხი.
20:00 საათზე, საქართველოს პარლამენტთან გელოდებით. აქ იქნება ბევრი სიტყვა, ბევრი მუსიკა, მაგრამ არ იქნებიან სიტყვით გამომსვლელები. თქვენ ნახავთ მოკლე ფილმს სანქცირებულ სისტემაზე, რომელიც ასანქცირებს ლაზარეს. თქვენ ნახავთ საზოგადოების იმ წევრებს, თუ რატომ იცავენ ლაზარეს. თქვენ ნახავთ კონცერტს, რომელშიც მონაწილეობას იღებენ საზოგადოებისთვის საყვარელი შემსრულებლები".- თქვა ჩერგოლეიშვილმა.
ლაზარე გრიგორიადისის მხარდასაჭერი აქცია თავდაპირველად მთავრობის ადმინისტრაციასთან უნდა ჩატარებულიყო. თუმცა, ხელისუფლებამ კანცელარიის შემოღობვა დაიწყო. მათი განცხადებით, ტერიტორიაზე სკვერის მოწყობას გეგმავენ, თუმცა ევროპული საქართველოს წევრის, ბესო დონაძის თქმით, ტენდერი გამოცხადებული არ არის.
"მოგვიწია აქციის პარლამენტის წინ გადმოტანა. ყველა ფორმალური ვალდებულება გავლილია, წერილებით ვაცნობეთ, პოლიციასაც მერიასაც. მაგრამ სამწუხაროდ, ერთი საათით გადაიდო სცენის აწყობის სამუშაოები, რადგან მიუხედავად იმისა, რომ ყველა ფორმალური მხარე დაცულია, პოლიციელები და სახელმწიფო დაცვის სამსახურის წარმომადგენლები მაინც ვიღაცასთან ტელეფონით ათანხმებენ. ანუ არსებობს ადამიანი, რომელმაც ზეპირი თანხმობა უნდა გასცეს".- ამბობს დონაძე.
მისივე თქმით, ლაზარე გრიგორიადისის დაცვა დღეს ძალიან პრინციპულია, რადგან ის მხოლოდ განხვავებულობის გამო დაიჭირეს.
