ეს ბოლო დიდი სიგნალია „ქართული ოცნებისთვის“, რომ ამერიკა არ და ვერ შეეგუება, რომ ქვეყანაში იყოს ანტიდემოკრატიული რეჟიმი და არაფორმალური მმართველობა, - ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.
მისი თქმით, „ყველაზე მეტად ვინც იყენებს საჯარო უფლებამოსილებას კერძო ინტერესებისთვის, ეს არის „ქართული ოცნება“ და მისი ხელისუფლება“.
„სტანდარტი არის, რომ საჯარო უფლებამოსილება არ უნდა იყოს გამოყენებული კერძო მიზნებისთვის. ეს არის პირდაპირი სიგნალი, რომ „ქართული ოცნება“ არის მთავარი სამიზნე ამ სანქციების. ეს ბოლო დიდი სიგნალია „ქართული ოცნებისთვის“, რომ ამერიკა არ და ვერ შეეგუება, რომ ქვეყანაში იყოს ანტიდემოკრატიული რეჟიმი და არაფორმალური მმართველობა. აქვე მინდა, ირაკლი კობახიძეს და „ქართული ოცნების“ პროპაგანდისტებს ვუპასუხო, დაიხვიეს გიორგი ბურჯანაძის გამოსვლა, ჩვენ ცალ ფეხზე არ დავდგებითო, ვითომ ვინმემ მოსთხოვა ცალ ფეხზე დადგომა. ვერ დადგები, ირაკლი, ცალ ფეხზე, პირდაპირ გეუბნები, რადგან უკვე მუხლებზე დგახარ რუსეთთან. შესაბამისად, რომც მოინდომო, ვერც დადგები ცალ ფეხზე“, – განაცხადა მანჯგალაძემ.
აშშ-მა მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს სანქციები დაუწესა.
