„პარტია, რომელსაც აქვს კეზერაშვილის ფინანსები, აქვს მერაბიშვილის იდეოლოგია და მართავს ხაბეიშვილი, პირდაპირ გვეუბნება და გვთავაზობს იმას, რომ ჩვენ ქვეყნის უკრაინიზაცია მოხდეს“, - ამის შესახებ ფრაქცია „ქართული ოცნების“ თავმჯდომარის მოადგილე ირაკლი ჩიქოვანმა პარლამენტის პლენარულ სხდომაზე განაცხადა.
დეპუტატის განცხადებით, ოპოზიცია საკუთარი ქმედებებით, ცდილობს საქართველოს ევროპული მომავლის დაკნინებას. საპარლამენტო უმრავლესობა კი გააგრძელებს 12 რეკომენდაციის შესრულებაზე მუშაობას.
„უმრავლესობამ ყველაფერი გააკეთა, ის რაც მასზეა დამოკიდებული, რომ შესრულებულიყო აბსოლუტურად ყველა რეკომენდაცია. დარჩენილია ორი, ამ რეკომენდაციებსაც შევასრულებთ. თქვენ ევროკავშირის საკითხს იყენებთ როგორც იარაღს. იარაღს, პოლიტიკური ძალის, „ქართული ოცნების“ წინააღმდეგ კი არა, არამედ საკუთარი სახელმწიფოს მიმართ. ეს არის მართლაც მოღალატეობრივი ქმედებები, მაშინ როდესაც საქართველოს სახელმწიფოს ევროპული პერსპექტივა გინდათ დააკნინოთ და საკუთარი პოლიტიკური ინტერესი წინ დააყენოთ. თქვით, რომ ამ ქვეყანაში თქვენ გინდათ რევოლუცია, ქვეყნის უკრაინიზაცია, მხოლოდ იმიტომ, რომ მოხვიდეთ ხელისუფლებაში. იმიტომ, რომ არჩევნებით ხელისუფლებაში ვერ მოდიხართ. საზოგადოებას კარგად ესმის, რომ პერსპექტივა თქვენთან ერთად არა აქვს“, - განაცხადა ირაკლი ჩიქოვანმა.
