ავღანეთის მთელ ტერიტორიაზე კანაბისის (მარიხუანის) მოყვანა აიკრძალა. ამის შესახებ ნათქვამია განკარგულებაში, რომელსაც ხელს აწერს მოძრაობა „თალიბანის“ უზენაესი ლიდერი ჰაიბათულა ახუნძადა.
„კანაბისის მოყვანა ქვეყნის მთელ ტერიტორიაზე კატეგორიულად იკრძალება {...} მოსამართლეებს ევალებათ დასაჯონ კანონდამრღვევები შარიათის კანონების თანახმად“, - ნათქვამია განკარგულებაში, რომელიც „თალიბანის“ ოფიციალური წარმომადგენლის ზაბიულა მუჯახიდის Twitter-ში გამოქვეყნდა.
ავღანეთი წარმოადგენს მსოფლიოში ოპიუმის უმსხვილეს და კანაბისის ერთ-ერთ უდიდეს მწარმოებელ ქვეყანას. სარწმუნო მონაცემები კანაბისის წარმოების მოცულობის შესახებ ქვეყანაში არ არსებობს. გაეროს ექსპერტების შეფასებით, სავარაუდოდ, 2009 წელს ტერიტორიის ფართობი, სადაც კანაბისის კულტივაცია ხდებოდა, ავღანეთის 17 პროვინციაში 10 000-დან 24 000-მდე ჰექტარს შეადგენდა.