უკრაინის პარლამენტის ფრაქცია „ხალხის მსახურის“ თავმჯდომარე დავით არახამია საქართველოს პრემიერ-მინისტრ ირაკლი ღარიბაშვილს პასუხობს, რომელმაც განაცხადა, რომ უკრაინის ხელისუფლების წარმომადგენლები საქართველოს შიდა საქმეებში ერევიან.
არახამია ამბობს, რომ „მთელ მსოფლიოს ესმის, რომ დემოკრატიის შენარჩუნება საქართველოში, რომლის ხელისუფლებაც სავსეა რუსეთის აგენტებით, მთელი მსოფლიო საზოგადოების საკვანძო ამოცანაა“
„ქართველ ხალხს ეს ესმის, ათობით ათას ახალგაზრდას საქრთველოში ეს ესმის, პრემიერ-მინისტრი კი თავს აჩვენებს, რომ არ ესმის. ვფიქრობ, რო ამას მაშინ გაიგებს, როდესაც გამოქვეყნდება მისი ახლო გარემოცვის ანგარიშები და ტრანზაქციები“, - წერს არახამიაTelegram-ზე.
ღარიბაშვილმა გუშინდელ ინტერვიუში უკრაინის ხელისუფლების წარმომადგენლები გააკრიტიკა.
„თქვენ ახსენეთ ზელენსკის მიმართვა. ახლა ომში მყოფი ადამიანი როდესაც იცლის და აქ, საქართველოში რამდენიმეათასიანი ადამიანის დესტრუქციულ აქციას ეხმაურება, ეს პირდაპირ არის მტკიცებულება, რომ ეს ადამიანი ჩართულია, მოტივირებულია, რომ აქაც რაღაც მოხდეს, შეიცვალოს“, – აღნიშნა ირაკლი ღარიბაშვილმა.
