ევროპული საქართველოს პარტიის ოფისში ვაკის პარკში მომხდარი ტრაგედიის შესახებ ბესიკ დონაძემ და გიორგი ნონიაშვილმა ბრიფინგი გამართეს.
მათი თქმით, ის რაც 13 ოქტომბერს ვაკის პარკში მოხდა არ არის ერთი გამონაკლისი შემთხვევა, როცა კორუფცია, ფლანგვა და პოლიტიკური დაუდევრობა კლავს ან შესაძლოა მოგკლას. ეს არის ამ ხელისუფლების და თბილისის მერიის ზოგადი სამუშაო წესი.
ამის სადემონსტრაციოდ ბესიკ დონაძემ და გიორგი ნონიაშვილმა გამართულ ბრიფინგზე რამდენიმე კონკრეტული კორუფციული გარიგების მაგალითი მოიყვანეს.
„ჩვენ გეტყვით, რატომ უნდა აიღოს კალაძემ პოლიტიკური პასუხისმგებლობა: ის, რაც 13 ოქტომბერს ვაკის პარკში მოხდა არ არის ერთი საგამონაკლისო შემთხვევა როცა კორუფცია, ფლანგვა და პოლიტიკური დაუდევრობა კლავს ან შესაძლოა მოგკლას. ეს არის ამ ხელისუფლების და თბილისის მერიის ზოგადი სამუშაო წესი.
მე მინდა ამის სადემონსტრაციოდ რამდენიმე მაგალითი მოვიყვანო:
წითელი ბაღის კეთილმოსაწყობას მერიამ შპს გრინსერვისს 2 მილიონ ლარამდე გადაუხადა. 1 წელიწადში ბაღი უკვე სარემონტო მდგომარეობაში იყო. უსაფრთხოების ნორმები დაცული კი არ არის.
2016 წელს ვარკეთილის მეტრო გაარემონტეს. 1 მილიონი ლარამდე დახარჯეს. 5 თვეში ჩამოინგრა. მშენებელ კომპანიას კი ამის სკოლების და სამედიცინო დაწესებულების რემონტი ანდეს.
გლდანში შპს ენსისიმ შეასრულა გზის სარეაბილიტაციო სამუშაოები. მერიამ ამისთვის შპს ენსისის 13 მილიონი გადაუხადა. სანიაღვრე სისტემა გამართულად არ მუშაობს, ძლიერ წვიმაზე იტბორება და საფრთხეებს აჩენს.
მეტროსადგური გოცირიძის 3 თვის ნაცვლად 18 თვეა ჩაკეტილია. დასრულების ვადა 7 ჯერ გადაწიეს.
ასეთი საქმეები ბევრია. 2013 წლიდან მოყოლებული შპს დემაქს ვაკე წარუმატებლად ცდილობდა მშენებლობის ნებართვა მიეღო ყიფშიძის ქუჩაზე. მას შემდეგ რაც ალტინფოელი კოკა მორგოშიას ოჯახი შემოიყვანა ბიზნესში, 3 თვეში მიიღო მშენებლობის ნებართვა. ამით მორგოშიებმა 2 მილიონ დოლარამდე იხეირეს.
და ბოლოს, გარდა იმისა რომ ვაკის პარკის საქმე არის სისხლის სამართლის პასუხისმგებლობა, ვაკის პარკის სამუშაოების დასრულებამდე გახსნა არის პოლიტიკური გადაწყვეტილება. პოლიტიკურ გადაწყვეტილებებზე კი პასუხისმგებელ პირებს უნდა ჰყოფნიდეთ ღირსება რომ პოლიტიკური პასუხისმგებლობა აიღონ“ - განაცხადა გიორგი ნონიაშვილმა
„კალაძის მმართველობა შეიძლება შეფასდეს მხოლოდ და მხოლოდ სამი სიტყვით, ეს არის კორუფცია, ნეპოტიზმი და გულგრილობა. მათი ქმედებები აქამდე აზიანებდა ბიუჯეტს, მაგრამ ახლა უკვე აზიანებს ადამიანთა ჯანმრთელობას და სიცოცხლეს. კალაძის და მისი გუნდის მიერ გაკეთებულ არცერთ მუნიციპალურ სერვისს და ინფრასტრუქტურულ პროექტს აღარ ექნება მოსახლეობის ნდობა, ეს პროექტები ვეღარ იქნება მოსახლეობისთვის უსაფრთხო. ამ ყველაფრიდან გამომდინარე კალაძემ და მისმა გუნდმა უნდა აიღონ პასუხისმგებლობა და დატოვონ თანამდებობები“ - ბესიკ დონაძე
