ევროპული საქართველო, ტაბულა, ამომრჩეველთა განათლების საზოგადოება, თავისუფლების ინსტიტუტი და აფხაზთა კრება, დღეს 20:00 საათზე პარლამენტის წინ უკრაინელ აქტივისტთა მიერ დაანონსებულ აქციას უერთდებიან.
მათი თქმით, უკრაინის მხარდაჭერა რუსული აგრესიის წინააღმდეგ, როგორც ჩვენი მორალური ვალი, ასევე ეროვნული ინტერესია, მითუმეტეს იმ პირობებში, როცა სათავეში პუტინისტური, კოლაბორაციონისტული და ქვეყნის ინტერესების მოღალატე ივანიშვილის რეჟიმი გვყავს.
„ამომრჩეველთა განათლების საზოგადოება დღეს 20:00 საათზე პარლამენტთან სოლიდარობის გამოსაცხადებლად შეურთდება უკრაინელ აქტივისტებს საქართველოში. ჩვენ ვიცით, რომ რუსეთი აგებს ბრძოლის ველზე, მაგრამ როგორც ყველა საზიზღარი, ბოროტმოქმედი რეჟიმი ის მშვიდობიან მოსახლეობას უსწორდება, ამას გავაპროტესტებთ დღეს ჩვენ და ყველას მოგიწოდებთ, რომ შემოგვიერთდეთ“ - თამარ ჩერგოლეიშვილი
„ამ აქციის ორგანიზატორები არიან უკრაინელი აქტივისტები საქართველოში. ჩვენ, ევროპული საქართველო პარტნიორ ორგანიზაციებთან ერთად ვუერთდებით ამ აქციას. ჩვენთვის, საქართველოს მოქალაქეებისთვის, როგორც ყველა თავისუფლების მოყვარე ადამიანისთვის მსოფლიოში, უკრაინის მხარდაჭერა არის პირველ რიგში მორალური ვალდებულება, ამ ფორმით გამოხატული მაინც, საჯარო განცხადებითა და პროტესტით ამ ბოროტების წინააღმდეგ, მაგრამ ამას გარდა, ეს ჩვენი ეროვნული ინტერესიცაა.
ჩვენ კარგად ვხედავთ როგორ სამარცხვინოდ იქცევა ჩვენი მოღალატე რეჟიმი ამ ვითარებაში. დღეს ამ ტრაგედიის ფონზე ჩვენ მოვისმინეთ ივანიშვილის პროპაგანდის გზავნილი, კერძოდ გოგა ხაინდრავას პირით ნათქვამი, კვლავ ნიშნის მოგებით საუბარი, მითითება იმაზე, თუ როგორ დაიჩაგრა უკრაინა და ამას აკეთებენ მხოლოდ ერთადერთი მიზეზით, რომ ომისა და მსხვერპლის შიშით გაიმყარონ ძალაუფლება საქართველოში. თითქოს დანებება არის გამოსავალი, ჩაწოლა და პოზიციის არ დაფიქსირება არის ჩვენი შვილების გადარჩენა.
ამაზე უზნეო და მოღალატეობრივი გზავნილი რთული წარმოსადგენია. სიმართლე არის სრულიად საპირსპირო, დღეს უკრაინელი ხალხი გმირულად იბრძვის და სჭირდება მსხვერპლის გაცემა იმიტომ, რომ იქამდე ვერც ჩვენ და ვერც უკრაინამ ვერ მოვახერხეთ საბჭოთა ჭაობიდან გაღწევა, რაც ლიტვა, ლატვია, ესტონეთმა და პოლონეთმა შეძლეს და ახლა არიან დაცულები. იმ პოლიტიკით, რასაც ივანიშვილის რეჟიმი ატარებს, იმ სამარცხვინო კაპიტულაციით ამ ვითარებაზეც კი, სწორედ რომ ბევრად მეტი მსხვერპლის გაღება მოგვიწევს მომავალში თუ დროზე არ დავასრულეთ ეს სამარცხვინო რეჟიმი“ - გიგა ბოკერია
„თავისუფლების ინსტიტუტიც უერთდება 20:00 საათზე ჩანიშნულ აქციას პარლამენტის წინ. რუსეთი არის ლაჩარი, მხდალი და ტერორისტი სახელმწიფო და დღეს ყველას მორალური ვალია, რომ ყველაფერი გააკეთოს რუსეთის შესაჩერებლად“ - სალომე ხვადაგიანი
„ტაბულაც უერთდება უკრაინელი აქტივისტების აქციას პარლამენტთან, თითოეული ჩვენგანის ვალია, რომ ამ ტერორისტულ აქტებს ვუპასუხოთ ხმამაღალი და დიდძალი ძალისხმევით ამ ბოროტების მიმართ“ - ლევან სუთიძე
