დღეს, 5 სექტემბერს, თბილისში, 2-დღიანი საერთაშორისო კონფერენცია იწყება. მაკკეინის ინსტიტუტი საერთაშორისო ლიდერობისთვის, ჯორჯ ბუშის ინსტიტუტი და ეკონომიკური პოლიტიკის კვლევის ცენტრი თბილისის მე-6 საერთაშორისო კონფერენციას უმასპინძლებენ.
ყოველი წლის სექტემბერში კონფერენცია თავს უყრის უსაფრთხოების რეგიონულ ექსპერტებს, ქართველ პოლიტიკოსებს, სამოქალაქო აქტივისტებს და ბიზნესის წარმომადგენლებს. როგორც ცნობილია, შეხვედრებზე იმსჯელებენ უკრაინის ომის შედეგად შექმნილ ახალ პოლიტიკურ და უსაფრთხოების რეალობაზე, სამხედრო აგრესიის გეოპოლიტიკურ შედეგებზე.
კონფერენციის „დიდება უკრაინას“ მონაწილეები 4 სექტებერს სოფელ ოძისში, საოკუპაციო ხაზთან იმყოფებოდნენ და უკანონო ბორდერიზაციის პროცესს ადგილზე გაეცნენ.
კერძოდ, სოფელ ოძისში ჩავიდნენ ჯორჯ ბუშის ინსტიტუტის გლობალური პოლიტიკის დირექტორი დევიდ კრამერი, ევროპარლამენტარი ანა ფოტიგა, აშშ-ის ყოფილი დიპლომატები და სხვები.
„ეს ადგილი ხდება ამ კონფერენციის რეგულარული გაჩერება. ჩვენ ეს ვიზიტი მიგვაჩნია უკიდურესად მნიშვნელოვნად, როგორც შეხსენება, თუ რა გადაიტანა საქართველომ 2008 წლიდან დღემდე და ეს არის ჩვენთვის გაკვეთილი, საიდანაც სწავლა შეგვიძლია. სწორედ ამიტომ მიგვაჩნია, რომ მნიშვნელოვანია,ჩვენმა დელეგაციამ თავისი ვიზიტი აქედან დაიწყოს, როგორც შეხსენება იმისა, რასთან ერთად გიწევთ ცხოვრება ყოველდღიურად. ეს არის ასევე ჩვენი მხარდაჭერის გამოხატულება საქართველოს, მისი სუვერენიტეტის და ტერიტორიული მთლიანობის მიმართ. ჩვენ გავაგრძელებთ საქართველოს მხარდაჭერას, რომ ერთ დღეს საქართველო კვლავ გაერთიანდეს საერთაშორისოდ აღიარებულ საზღვრებში“, – განაცხადა ჯორჯ ბუშის ინსტიტუტის გლობალური პოლიტიკის დირექტორმა დევიდ კრამერმა.
