ესტონეთი და ფინეთი შეთანხმდნენ, რომ გააერთიანონ სანაპირო დაცვა მას შემდეგ, რაც ეს უკანასკნელი ჩრდილოატლანტიკურ ალიანსს შეუერთდება. ეს შესაძლებელს გახდის ბალტიის ზღვაში გასასვლელის დახურვას რუსული ხომალდებისთვის. ამის შესახებ ესტონეთის თავდაცვის მინისტრმა ჰანო პევკურმა განაცხადა.
"ესტონური და ფინური რაკეტების მოქმედების დიაპაზონი აღემატება ფინეთის ყურის სიგანეს", - თქვა პევკურმა.
მისი თქმით, ფინეთის თავდაცვის მინისტრთან შეხვედრაზე შეთანხმდნენ ქვეყნების თავდაცვის გაერთიანებასა და ინფორმაციის გაცვლაზე.
ერთობლივი ანტისარაკეტო თავდაცვა ნატოს ქვეყნებს საშუალებას მისცემს საჭიროების შემთხვევაში დახურონ ფინეთის ყურე.
"ბალტიის ზღვა გახდება ნატოს შიდა ზღვა, როდესაც ფინეთი და შვედეთი ალიანსს შეუერთდებიან", - აღნიშნა პევკურმა.
უკრაინაში რუსეთის მიერ გაჩარებული ომის ფონზე, შვედეთმა და ფინეთმა უარი თქვეს ტრადიციულ ნეიტრალურ სტატუსზე და 18 მაისს ნატოში გაწევრიანების განაცხადები წარადგინეს.
29 ივნისს ნატომ ოფიციალურად მიიწვია შვედეთი და ფინეთი ალიანსში გასაწევრიანებლად. მათი ალიანსში გაწევრიანება უნდა დაამტკიცოს ორგანიზაციის 30-ვე წევრმა ქვეყანამ.
9 აგვისტოს მდგომარეობით, ნატო-ს 23-მა ქვეყანამ უკვე მოახდინა შვედეთის და ფინეთის გაწევრიანების პროტოკოლების რატიფიცირება.
