ელექტროენერგიის ხარჯების ზრდისა და წიაღისეულ საწვავზე დამოკიდებულების შემცირების მცდელობების ფონზე,ესპანურმა ენერგეტიკულმა კომპანიამ Iberdola-მ ჩართო ევროპაში უდიდესი მზის ელექტროსადგური. ინფორმაციას Bloomberg-ი ავრცელებს.
ესპანეთში ელექტროენერგიის ღირებულება ახლა თითქმის სამჯერ აღემატება ბოლო ხუთი წლის საშუალო მაჩვენებელს. ვინაიდან ესპანეთი ევროპის ერთ-ერთი ყველაზე მზიანი ქვეყანაა, ის ეყრდნობა მზის პანელებს, როგორც ენერგიის ალტერნატიულ წყაროს.
Iberdola-ს მზის ელექტროსადგური, რომელიც სამხრეთ-დასავლეთ ესპანეთში, ესტრემადურას ავტონომიურ გაერთიანებაში მდებარეობს, დაახლოებით 1.5 მილიონი მზის პანელისგან შედგება და 334 000-ზე მეტი სახლის ელექტროენერგიით უზრუნველყოფა შეუძლია.
მოელიან, რომ ელექტროსადგური ენერგიის წარმოების სრულ სიმძლავრეს მომდევნო თვეში მიაღწევს. თუმცა, Bloomberg-ი აღნიშნავს, რომ ნაკლებად სავარაუდოა, ელექტროენერგიის ფასების შემცირებას შეუწყოს ხელი.
2030 წლისთვის ესპანეთი გეგმავს მთელი ენერგიის 75% ალტერნატიული წყაროების მეშვეობით მიიღოს, ახლა ეს მაჩვენებელი დაახლოებით 47%-ს შეადგენს.