საპროტესტო აქციის მონაწილეებმა პარლამენტიდან მთავრობის ადმინისტრაციასთან გადაინაცვლეს, სადაც ღამეს გათენებას გეგმავენ.
მთავრობის ადმინისტრაციის შენობასთან შეკრება ჯერ კიდევ პარლამენტის შენობის წინ გამოსვლისას შოთა დიღმელაშვილმა დაანონსა.
"დილით ჩვენ ყველანი წავალთ ძალიან მშვიდობიანად, შემოვევლებით ქაჯეთის ციხეს და მჯდომარე პროტესტით, მშვიდობიანად დავხვდებით მთავრობას, დავხვდებით ღარიბაშვილს და შევასმენთ ჩვენს ხმას, რადგან აქედან აქედან არ ესმით... მივალთ დილით და ავუხსნით იმას, რაც აქედან ვერ ავუხსენით, ჩაგვხედოს თვალებში და გვითხრას, რატომ მიჰყავს ქვეყანა რუსეთისკენ", - თქვა დიღმელაშვილმა.
მოძრაობა "სირცხვილიას" კიდევ ერთი წარმომადგენლის ნოდარ რუხაძის განცხადებით, მთავრობის ადმინისტრაციასთან შეკრებილებით, დილით პრემიერ-მინისტრს დახვდებიან
"ირაკლი ღარიბაშვილი მივა კანცელარიაში და შეეცდება, რომ ჩაატაროს სხდომა. მე, ერთი ადამიანი ჩემს გუნდთან ერთად, ვაპირებ, რომ მას დავხვდე. გთხოვთ, გადავინაცვლოთ და შევუერთდეთ მსვლელობას კანცელარიამდე. დღეს ვრჩებით კანცელარიასთან",- თქვა რუხაძემ.
აქციის მთავარი მოთხოვნაა, გადადგეს ირაკლი ღარიბაშვილი და ეროვნული თანხმობით, შეიქმნას მთავრობა, რომელიც ევროკავშირის რეკომენდაციის 12-ვე პუნქტს შეასრულებს.
