პრორუსული, ძალადობრივი ჯგუფების მესვეურებმა და მათმა მხარდამჭერებმა თბილისში, ევროკავშირის წარმომადგენლობის ოფისთან ნატოსა და ევროკავშირის დროშები დაწვეს.
დროშების დაწვის მოწოდებით ჰომოფობიური ჯგუფის ერთ-ერთი ლიდერი კოკა მორგოშია გამოვიდა.
დილიდან, ჰომოფობიური ჯგუფების მხარდამჭერები თბილისში, სხვადასხვა ლოკაციაზე შეიკრიბნენ. ისინი გვიან ღამით, "ალტ-ინფოს" 26 წევრის დაკავებას აპროტესტებდნენ. ამავდროულად, შეკრებებზე აქტიურად აჟღერებდნენ ანტიდასავლურ გზავნილებს.
ევროკავშირის წარმომადგენლობის ოფისამდე, ჰომოფობიური ჯგუფები პარლამენტის შენობასთან შეიკრიბნენ, სადაც ასევე გააპროტესტეს "თბილისი პრაიდის" ფარგლებში დაგეგმილი მუსიკალური ფესტივალი. ამასთან, პარლამენტის შენობის წინ მათ ლგბტგქ+ დროშა დახიეს.
პარლამენტთან მიმდინარე ჰომოფობიური საპროტესტო აქციის ერთ-ერთმა მონაწილემ თავის დაწვა სცადა. მან ბენზინი გადაისხა და ცეცხლი წაიკიდა, მოგვიანებით კი შადრევანში ჩავიდა.
წუხელ, გვიან ღამით, პოლიციამ მთაწმინდაზე, "თბილისი პრაიდის" მუსიკალური ფესტივალის საწინააღმდეგო აქციაზე 26 პირი დააკავა. მათ შორის, ზურა მახარაძე, ბექა ვარდოსანიძე, ირაკლი მარტინენკო და გურამ და ალექსანდრე ფალავანდიშვილები.
შსს-ს ცნობით, 26-ივე პირი ადმინისტრაციული წესითაა დაკავებული, ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციის მიმართ წინააღმდეგობა) მუხლებით.