პოლონეთის პარლამენტის (სეიმის) მარშალის მოადგილემ, მალგოჟატა გოშევსკამ, რომელიც პრეზიდენტ ზურაბიშვილის ორგანიზებით მიმდინარე თბილისის ქალთა საერთაშორისო კონფერენციაზე სიტყვით გამოვიდა, მიხეილ სააკაშვილის მდგომარეობის შესახებ ისაუბრა.
მალგოჟატა გოშევსკას განცხადებით, საქართველოს მესამე პრეზიდენტი მსოფლიოს თვალწინ იღუპება და ამას არავინ უნდა შეეგუოს.
მისივე თქმით, მიხეილ სააკაშვილის წინააღმდეგ ბრალდებები აბსურდულია და რომ არცერთი ევროპული სასამართლო არ დაიწყებდა ამ საქმეების წარმოებასა და განხილვას.
"საქართველოს ციხეში ახლა საავადმყოფოში რთულ მდგომარეობაში იმყოფება საქართველოს ყოფილი პრეზიდენტი, მიხეილ სააკაშვილი. ეს როგორც ჩანს პირველი შემთხვევაა ევროპაში მეორე მსოფლიო ომის შემდეგ, რომ პრეზიდენტი გასამართლებულია მისივე ქვეყნის სასამართლოს მიერ. ბრალდებები მის წინააღმდეგ არის აბსურდული. არცერთი ევროპული სასამართლო არ დაიწყებდა საქმის წარმოებასა და განხილვას, მაგრამ ახალა არ ვისაუბრებ ბრალდებებზე, უფრო მეტად ადამიანურობაზე გავამახვილებ ყურადღებას. საქართველოს მთავრობის მიერ უარი ეთქვა ექიმთა საერთაშორისო ჯგუფს, რომ ჩაეტარებინათ ყოფილი პრეზიდენტის სამედიცინო კვლევა, ასევე მისთვის შეუძლებელია ჰუმანიტარულ ფარგლებში მიიღოს შესაბამისი მკურნალობის კურსი საზღვარგარეთ. ეს ბარბაროსობაა, რასაც არაფერი საერთო არ აქვს ევროპულ ღირებულებებთან. ძვირფასო ქალბატონებო და ბატონებო, ერთი ქართველი ოლიგარქის გადაწყვეტილებით, მთელი მსოფლიოს თვალწინ იღუპება ადამიანი, ამ ქვეყნის ყოფილი პრეზიდენტი, არ შევეგუოთ ამას", - აღნიშნა გოშევსკამ სიტყვით გამოსვლისას.
