მედიის თავისუფლების დარღვევა და ჟურნალისტების უსაფრთხოება საქართველოში - ამ საკითხებზე ევროპარლამენტში დებატები გაიმართა.
ტრიბუნიდან ევროპარლამენტარებმა საქართველოში არსებულ ვითარებასა და ევროკავშირის წევრობის კანდიდატის სტატუსის მინიჭების თაობაზე ილაპარაკეს.
დებატებზე გამხსნელი სიტყვით წარსდგა ევროპარლამენტარი მირიამ ლექსმანი, რომელმაც საქართველოში მედიის თავისუფლების შეზღუდვისა და დემოკრატიულ უკუსვლაზე ისაუბრა.
ლექსმანის განცხადებით, საქართველოში განვითარებული მოვლენები ეწინააღდეგება ქართველი ხალხის სურვილს, რომელიც დემოკრატიულ და თავისუფალ ქვეყანაში ცხოვრებასა და ევროპულ მომავალს ესწრაფვის.
"მოვუწოდებ საქართველოს ხელისუფლებას, პატივი სცეს საკანონმდებლო ჩარჩოს, რომლითაც გარანტირებულია გამოხატვის თავისუფლება და მედიის თავისუფლება, გააძლიეროს რეფორმები სასამართლო სისტემის დამოუკიდებლობისთის, დაამთავროს პოლარიზაცია და შეაჩეროს დემოკრატრიული უკუსვლა", - თქვა ლექსმანმა.
ამასთან, მირიამ ლექსმანი ბიძინა ივანიშვილისთვის სანქციების დაწესების მოწოდებით გამოვიდა.
"საქართველოს ევროპული გზის მხარდასაჭერად მნიშვნელოვანია, სანქციები დაუწესდეს ოლიგარქ ბიძინა ივანიშვილს იმ დესტრუქციული წვლილისთვის, რაც მას საქართველოს პოლიტიკასა და ეკონომიკაში შეაქვს", - განაცხადა ევროპარლამენტარმა.
მირიამ ლექსმანმა ასევე აღნიშნა, რომ ევროპარლამენტში ქართველი ხალხის მეგობრებს არ შეუძლიათ მშვიდად უყურონ, თუ როგორ სუსტდება დემოკრატია. "ჩვენ ქართველი ხალხის გვერდით ვდგავართ".