ჩვენი მომავალი ნამდვილად არ არის დაკავშირებული იმასთან, თუ ვინ დანიშნავს ელჩს, რა ადგილას და როდის, - განაცხადა იტალიაში ვიზიტით მყოფმა საქართველოს პრეზიდენტმა სალომე ზურაბიშვილმა "პირველი არხის" ჟურნალისტის საპასუხოდ, რომელიც მთავრობის მიერ წარდგენილ საკონსტიტუციო სარჩელს შეეხებოდა.
პრეზიდენტის თქმით, დღეს, იტალიაში საქართველოსთვის უფრო მნიშვნელოვანი საკითხები წყდება.
"შეიძლება მომავალ კვირას, შეიძლება ხვალვე, არ ვიცი ზუსტად როდის, წყდება ჩვენი მომავალი და ჩვენი მომავალი ნამდვილად არ არის დაკავშირებული იმასთან, თუ ვინ დანიშნავს ელჩს, რა ადგილას და როდის. ამ ყველაფერზე უთუოდ გავაკეთებ კომენტარებს, მაგრამ ამის დრო მოვა, როცა ვიქნები თბილისში და არა მაშინ, როცა ვიმყოფები ევროპის გულში, ჩვენთვის ევროპის გზაზე გადამწყვეტ მომენტში. ეს გზა თუ გვინდა, ამ გზაზე მყარად უნდა ვიდგეთ და სხვა რაღაცებზე არ ვფიქრობდეთ", - განაცხადა სალომე ზურაბიშვილმა.
შეგახსენებთ, საქართველოს მთავრობამ [პრეზიდენტსა და მთავრობას შორის] უფლებამოსილების გამიჯვნასთან დაკავშირებით საკონსტიტუციო სასამართლოს სარჩელით მიმართა.
ხელისუფლებისა და "ქართული ოცნების" მესვეურების განცხადებით, პრეზიდენტი ხელს უშლის ელჩების დანიშვნასა და გათავისუფლებაში. მათი თქმით, კონსტიტუციის თანახმად, პრეზიდენტის უფლებამოსილება ელჩების დანიშვნა/გათავისუფლებასთან დაკავშირებით მხოლოდ სიმბოლურია და მან მთავრობის პოზიცია უნდა გაითვალისწინოს.
ამავდროულად, "ქართული ოცნების" თავმჯდომარემ ირაკლი კობახიძემ კონკრეტულად ისაუბრა იმ ელჩების თაობაზე, რომელთა დაკავშირებითაც პრეზიდენტს განსხვავებული პოზიცია ჰქონდა. მისი თქმით, მთავრობამ პრეზიდენტს გაერო-ში მუდმივ წარმომადგენლად დავით ბაქრაძის კანდიდატურა შესთავაზა, ხოლო კანადაში კახა იმნაძისა, რომელიც ჯერ კიდევ გაეროში ელჩის თანამდებობას იკავებს. კობახიძის თქმით, იმნაძე ვადაზე ადრე უნდა გათავისუფლებულიყო ამ პოზიციიდან და გადაეყვანათ კანადაში.
