საქართველოს კულტურის, სპორტისა და ახალგაზრდობის საქმეთა მინისტრმა, თეა წულუკიანმა კომენტარი გააკეთა ეროვნული მუზეუმიდან 40-მდე თანამშრომლის გათავისუფლების თაობაზე.
წულუკიანის თქმით, საჯარო დაწესებულებების თანამშრომლები ერთი მხრივ, ვალდებულენი არიან, რომ იარონ სამსახურში, ხოლო მეორე მხრივ, ჰქონდეთ შესაბამისი კომპეტენცია.
"ეს გახლავთ სამინისტრო და არა რაიმე კერძო კომპანია ან, ბოდიშს ვიხდი გამოთქმისთვის, ბუტკა. ეს არის საჯარო ორგანიზაციები, დაახლოებით 100-მდე, რომლებსაც კულტურის სამინისტრო მართავს და ძალიან მნიშვნელოვანია, რომ თანამშრომელი, რომელიც ხელფასს იღებს, მინიმუმ სამსახურში დადიოდეს. და როდესაც დადის და თუ დადის სამსახურში, მას ჰქონდეს იმის უნარი, რომ საკუთარ საჯარო პასუხისმგებლობას თვალი კომპეტენტურად გაუსწოროს. მე სრულ მხარდაჭერას ვუცხადებ ახალ ხელმძღვანელობას, იქნება ეს ხელოვნების მუზეუმში თუ სიმონ ჯანაშიას სახელობის მუზეუმში", - თქვა თეა წულუკიანმა.
