ინდოეთი შაქრის ექსპორტზე შეზღუდვებს აწესებს, რათა გაზარდოს მისი ხელმისაწვდომობა შიდა ბაზარზე და თავიდან აიცილოს ფასების ზრდა, წერს გამოცემა The Economic Times-ი.
მთავრობამ მიმწოდებლებისთვის საზღვარგარეთ შაქრის გაყიდვის ნებართვის მოპოვება სავალდებულო გახადა.
საგარეო ვაჭრობის გენერალური დირექტორატის (DGFT) შეტყობინების თანახმად, შეზღუდვა ეხება ნედლი, რაფინირებული და თეთრი შაქრის ექსპორტს. ამასთან, აღნიშნულია, რომ შეზღუდვები არ გავრცელდება შაქრის მიწოდებაზე აშშ-სა და ევროკავშირში ადრე დადგენილი კვოტების ფარგლებში.
აღსანიშნავია, რომ ინდოეთმა ბოლო ექვსი წლის განმავლობაში პირველად დააწესა შეზღუდვები შაქრის ექსპორტზე.
ინდოეთი არის მსოფლიოში შაქრის უდიდესი მწარმოებელი და მეორე უდიდესი ექსპორტიორი ბრაზილიის შემდეგ. ექსპერტების თქმით, ინდოეთის ეს გადაწყვეტილება გავლენას მოახდენს შაქრის ფასებზე მთელ მსოფლიოში.
მანამდე ინდოეთმა საზღვარგარეთ ხორბლის მიწოდების აკრძალვა დააწესა.
