საქართველოში უკრაინის საელჩოს წარმომადგენლის, ანდრეი კასიანოვის განცხადებით, უკრაინაში გაკვირვებით ადევნებენ თვალყურს საქართველოში მიმდინარე შიდა დისკუსიებს ომის პარტიებსა და მეორე ფრონტის გახსნის თაობაზე. ამის შესახებ კასიანოვმა საელჩოში გამართულ პრესკონფერენციაზე განაცხადა.
"ძალიან გაკვირვებით ვუყურებთ შიდა დისკუსიას საქართველოში, რომელიც ეხება „ომის პარტიებს“ და „მეორე ფრონტის გახსნას“. ჩვენ გვიკვირს, რადგან უკრაინას არ დაუწყია ომი რუსეთის ფედერაციასთან. ჩვენ თავს დაგვესხა რუსეთი. ჩვენთვის გასაკვირია, რადგან 24 თებერვლის შემდეგ, უკრაინაში სხვა პარტია არ არსებობს. არსებობს მხოლოდ გამარჯვების პარტია. ამას ყოველდღე აჩვენებენ უკრაინის შეიარაღებული ძალები, ხალხი, უმაღლესი რადა და პრეზიდენტი", - განაცხადა კასიანოვმა.
ომში საქართველოს ჩათრევასთან დაკავშირებით ჟურნალისტის შეკითხვას კასიანოვმა შემდეგნაირად უპასუხა: "რუსეთის აგრესიას 2014 წლიდან მოყოლებული უკრაინა ებრძვის მარტო".
