უკრაინაში ვიზიტმა კიდევ ერთხელ აჩვენა, რომ სახელმწიფოებრივ დონეზე საქართველოსა და უკრაინას შორის არანაირი წინააღმდეგობა, დაპირისპირება არ არსებობს, - ამის შესახებ პარლამენტის საგარეო ურთიერთობათა კომიტეტის თავმჯდომარის მოადგილემ, გიორგი ხელაშვილმა განაცხადა.
ხელაშვილის თქმით, ვიზიტის მთავარი მიზანი იყო უკრაინისთვის ქართველი ხალხის მხარდაჭერის გადაცემა და აგრეთვე იმ პოლიტიკური გაუგებრობის აღმოფხვრა, რომელიც ბოლო ხანებში შეიქმნა.
"ამ ვიზიტმა კიდევ ერთხელ აჩვენა რომ საქართველოს და უკრაინას შორის სახელმწიფოებრივ დონეზე არანაირი წინააღმდეგობა, არავითარი დაპირისპირება, რაიმე გადაუწყვეტელი პრობლემა არ არსებობს. ვიზიტის მთავარი მიზანი იყო უკრაინისთვის ქართველი ხალხის მხარდაჭერის გადაცემა და აგრეთვე იმ მცირედი პოლიტიკური გაუგებრობის აღმოფხვრა, რომელიც ბოლო ხანებში შეიქმნა. ვიზიტმა ძალიან კარგად აჩვენა, რომ ეს იყო გაუგებრობა. წუხილით უნდა აღინიშნოს, რომ რადიკალური პოზიცია კიდევ ვერ აღმოჩნდა მოწოდების სიმაღლეზე, კიდევ ერთხელ შეირცხვინეს თავი", - განაცხადა ხელაშვილმა.
შეგახსენებთ, საპარლამენტო დელეგაცია, რომელიც კიევში, ბუჩასა და ირპინში იმყოფებოდა, საქართველოში დღეს დაბრუნდა.