საქართველოს აქვს შესაძლებლობა საქართველოს პრეზიდენტის მიერ ევროპარლამენტში გაკეთებული განცხადებები დაადასტუროს და ჟენევის საერთაშორისო მოლაპარაკებების მორიგ რაუნდზე ძალის გამოუყენებლობის შეთანხმებას ხელი მოაწეროს. ეს განცხადება აფხაზეთის დე-ფაქტო მთავრობის პრემიერ-მინისტრმა სერგეი შამბამ სააგენტო "ჯი-ეიჩ-ენთან" საუბარში საქართველოს პრეზიდენტის ევროპარლამენტში გაკეთებული განცხადების კომენტირებისას გააკეთა.
"ჩვენ ხშირად გაგვიგონია ამგვარი განცხადებები საქართველოს პრეზიდენტისგან, იმის წინა პრეზიდენტისგან, ბევრ ხელშეკრულებაზე და შეთანხმებაზეც მოგვიწერია ხელი. ამას გარდა, სამხრეთ ოსეთში ომის დაწყებამდე ასევე იყო გაკეთებული მსგავსი განცხადებები იმის შესახებ რომ საქართველო სამხედრო ძალას არ გამოიყენებდა. ამ განცხადებების არ მჯერა", _ აცხადებს "ჯი-ეიჩ-ენთან" საუბარში სერგეი შამბა და დასძენს, რომ თუ ყოველივე, რაც საქართველოს პრეზიდენტმა ევროპარლამენტში განაცხადა სიმართლეა, ქართველებს ამის დადასტურების საშუალება ნამდვილად აქვთ.
"არსებობს ჟენევის საერთაშორისო მოლაპარაკებათა ფორმატი. თუ საქართველოს მართლაც ის სურს რაც განაცხადა, მორიგ შეხვედრაზე მას ექნება საშუალება იურიდიულად სავალდებულო ძალის გამოუყენებლობის შეთანხმებას მოაწეროს ხელი", _ აცხადებს სერგეი შამბა სააგენტო "ჯი-ეიჩ-ენთან" საუბარში.
