"თბილისმა ობიექტურად უნდა აღიაროს ის, რაც 2008 წლის აგვისტოში მოხდა და უარი უნდა თქვას ტერმინზე "ოკუპირებული ტერიტორიები", - ეს არის ის ორი პირობა, რომელთა შესრულების შემთხვევაში რუსეთის დუმის საერთაშორისო საქმეთა კომიტეტის თავმჯდომარის კონსტანტინე კოსაჩოვის აზრით მოსკოვსა და თბილისს შორის დიალოგის დაწყება შესაძლებელი იქნება.
კოსაჩოვი აღნიშნავს, რომ ეს ამ პრობლემასთან დაკავშირებული მისი პირადი აზრია და არა რუსეთის ფედერაციის ოფიციალური პოზიცია.
"ეს ჩემი პირადი აზრია და არა რუსეთის ოფიციალური პოზიცია", _ აცხადებს კოსაჩოვი და განმარტავს, თუ რატომ უნდა ამოიღოს ხმარებიდან საქართველომ რუსეთისთვის ასე არასასიამოვნო ტერმინი "ოკუპირებული ტერიტორიები".
"ტერმინს "ოკუპირებული ტერიტორიები" პოლიტიკური დიალოგიდან გამოჰყავს აფხაზეთისა და სამხრეთ ოსეთის მოსახლეობა. ამ ტერმინის გამოყენებით ეს ადამიანები ხდებიან ან ოკუპანტები ან ოკუპირებულები. მაგრამ ვინაიდან ისინი არ არიან არც ოკუპანტები და არც ოკუპირებულები, ცხადია ვხვდებოდეთ, რომ პოლიტიკური დიალოგი იქნება ან მათთან ან იგი საერთოდ არ იქნება", _ აცხადებს კოსაჩოვი.
