თუ საქართველოს მართლაც სურს სამხრეთ ოსეთთან ურთიერთობების დარეგულირება, იურიდიულად სავალდებულო ძალის გამოუყენებლობის შესახებ შეთანხმებას უნდა მოაწეროს ხელი. ეს განცხადება სეპარატისტული სამხრეთ ოსეთის ე. წ. საგარეო საქმეთა მინისტრმა მურატ ჯიოევმა საქართველოს პრეზიდენტის მიერ ევროპარლამენტში გაკეთებული განცხადების კომენტირებისას გააკეთა.
ჯიოევი შეახსენებს საქართველოს, რომ რუსი სამხედროებს, რომლებიც ე. წ. სამხრეთ ოსეთის ტერიტორიაზე დგანან, "არავითარი კავშირი საქართველოსთან არ აქვთ".
"საქართველოს პრეზიდენტის გამოსვლა მორიგი პიარაქციაა და სხვა არაფერი. სააკაშვილზეა სწორედ 2008 წლის აგვისტოს პასუხისმგებლობა. მისი განცხადებები კი მხოლოდ ლამაზი დეკლარაციაა და სხვა არაფერი", _ აცხადებს ჯიოევი.
მისი თქმით, საქართველოს 2008 წლის აგვისტომდეც გაუკეთებია მსგავსი განცხადებები, მაგრამ ყველა მათგანი საბოლოო ჯამში 2008 წლის აგვისტოში დაარღვია.
"იმ შემთხვევაში, თუ საქართველოს მართლაც სურს სამხრეთ ოსეთთან ურთიერთობების დარეგულირება მშვიდობიანი გზით, მან სწორედ სამხრეთ ოსეთთან უნდა აწარმოოს დიალოგი და სწორედ მასთან უნდა მოაწეროს ხელი თავდაუსხმელობის ხელშეკრულებას", _ აცხადებს ჯიოევი.
მისი თქმით, სააკაშვილი იყენებს თეზისს, რომლის მიხედვითაც, მრავალგზის გამეორებული სიცრუე უკვე სიმართლედ გეჩვენება.
"მან კიდევ ერთხელ მოუწოდა ევროპას, მოახდინოს რუსეთზე ზეწოლა და აფხაზეთსა და სამხრეთ ოსეთში რუსი სამხედროების ყოფნა "ოკუპაციად" შეაფასოს", _ აცხადებს ჯიოევი და დასძენს, რომ "რუსი სამხედროები ამ ტერიტორიებზე საერთაშორისო სამართლის ნორმების სრული დაცვით იმყოფებიან და არავითარი კავშირი საქართველოსთან არ აქვთ".
