რუსეთის თავდაცვის სამინისტრო უკრაინაში "კინჟალის" ჰიპერბგერითი რაკეტების მორიგი გამოყენების შესახებ იუწყება.
უწყების განცხადებით, უკრაინაში არსებული სამიზნეები შავი და კასპიის ზღვიდან გაშვებული "კალიბრის" რაკეტების, ასევე "კინჟალის“ ჰიპერბგერით რაკეტების გამოყენებით განადგურდა.
"კასპიის ზღვის წყლებიდან გაშვებულმა "კალიბრის" საზღვაო-საკრუიზო რაკეტებმა, ასევე ყირიმის ტერიტორიიდან გაშვებულმა "კინჟალის" ჰიპერბგერითმა აერობალისტიკურმა რაკეტებმა, გაანადგურეს უკრაინის არმიის საწვავის და საპოხი მასალების შესანახი დიდი ბაზა მიკოლაივის ოლქის კონსტანტინოვკას რაიონში", - იუწყება აგრესორი ქვეყნის თავდაცვის სამინიტრო.
თავდაცვის სამინისტროს სპიკერის, იგორ კონაშენკოვის განცხადებით, შავი ზღვიდან გაშვებულმა "კალიბრის" რაკეტებმა გაანადგურეს ნეჟინსკის სარემონტო ქარხნის საამქროები, სადაც ომში დაზიანებული უკრაინული ჯავშანტექნიკის შეკეთება ხდებოდა.
კონაშენკოვის მტკიცებით, რუსეთის არმიამ გაანადგურა ჟიტომირის ოლქში არსებული სპეცოპერაციების საწვრთნელი ცენტრი, "სადაც იმყოფებოდნენ უკრაინაში ჩასული უცხოელი დაქირავებულები".
"განადგურდა სპეცოპერაციის ძალების 100-ზე მეტი სამხედრო მოსამსახურე და უცხოელი დაქირავებული ჯარისკაცი", - ირწმუნება აგრესორი.
მისივე მტკიცებით, გასული ღამის განმავლობაში რუსეთის ოპერატიულ-ტაქტიკურმა და სამხედრო ავიაციამ გაანადგურა უკრაინის 62 სამხედრო ობიექტი, "მათ შორის, სამი სამეთაურო პუნქტი, სარაკეტო და საარტილერიო იარაღის ორი საცავი და ერთი საწვავის საცავი".
მისი თქმით, რუსულმა საჰაერო თავდაცვის სისტემებმა კოხანნოეს დასახლების მიდამოში ჩამოაგდეს უკრაინის საჰაერო ძალების ერთი ვერტმფრენი, ექვსი უპილოტო საფრენი აპარატი, მათ შორის ერთი Bayraktar TB-2.
რუსეთის თავდაცვის სამინისტროს ეს მონაცემები უკრაინულ მხარეს არ დაუდასტურებია.
უკრაინაში "კინჟალის" ჰიპერბგერითი რაკეტების გამოყენების შესახებ რუსეთის თავდაცვის სამინისტრომ პირველად 19 მარტს განაცხადა. მოგვიანებით ეს ინფორმაცია აშშ-ის დაზვერვამაც დაადასტურა.
რუსეთის სამხედრო ძალების მტკიცებით, "კინჟალის" სარაკეტო სისტემას შეუძლია სამიზნეების განადგურება 2000 კმ-ზე მეტ მანძილზე და აქვს უნარი გადალახოს ყველა არსებული საჰაერო და რაკეტსაწინააღმდეგო თავდაცვის სისტემა.
რუსეთმა პირველად გამოიყენა ეს იარაღი სირიაში სამხედრო კამპანიის დროს 2016 წელს.
