კავკასიის გარემოსდაცვითი არასამთავრობო ორგანიზაციების ქსელის (CENN) დაკვეთით, კახეთის რეგიონში აჭარიდან ჩასახლებული ოჯახების სოციოლოგიური კვლევა ჩატარდა. კვლევის მიზანი ეკომიგრაციასთან დაკავშირებული პრობლემების იდენტიფიცირება და განსახლების პროცესის მიმართ სტიქიის ზონიდან განსახლებული ოჯახების დამოკიდებულების გარკვევა იყო.
გამოკითხვა კახეთის საინფორმაციო ცენტრის სოციოლოგიური კვლევის ჯგუფმა ჩაატარა. კვლევა ახმეტის, ლაგოდეხის, სიღნაღის და დედოფლისწყაროს იმ სოფლებში ჩატარდა, სადაც ეკომიგრანტები ცხოვრობენ.
კვლევის შედეგების პრეზენტაცია 25 ნოემბერს, 15:00 საათზე, თბილისში, სასტუმრო „ამბასადორში" გაიმართება.
შეგახსენებთ, რომ 25 - 26 ნოემბერს „ღია გარემოსდაცვითი სამოქალაქო ინიციატივა" საქართველოს რეგიონებში საზოგადოებრივი და სახელმწიფო ინიციატივების შესახებ კონფერენციას ატარებს.
