“მივესალმებით უკრაინელი ხალხისადმი საქართველოს მთავრობის მტკიცე მხარდაჭერას, განსაკუთრებით რუსეთის მუქარისა და საქართველოს ტერიტორიების ოკუპაციის ფონზე." - ამის შესახებ აშშ-ის ჰელსინკის კომისიის თავმჯდომარე სენატორი ბენ კარდინი, თანათავმჯდომარე კონგრესმენი - სტივ კოენი, კომისიის წევრები - სენატორი როჯერ უიკერი და კონგრესმენი ჯო უილსონი, აშშ-ის მოკავშირეებისა და პარტნიორების მიერ, უკრაინის წინააღმდეგ რუსეთის ომის საპასუხოდ გაწეული ძალისხმევის თაობაზე გამოქვეყნებულ ერთობლივ განცხადებაში აღნიშნავენ.

ამასთან, ამერიკელი სენატორები და კონგრესმენები მადლობას უხდიან საქართველოს გაერო-ს გენერალური ასამბლეის რეზოლუციის - "აგრესია უკრაინის წინააღმდეგ"თანასპონსორობისთვის, ასევე რუსეთის მიერ, უკრაინაში განხორციელებული ომის დანაშაულების გამოძიების მიზნით, სისხლის სამართლის საერთაშორისო სასამართლოსადმი მიმართვაში საქართველოს მონაწილეობისთვის. განცხადების ავტორები ასევე მიესალმებიან საქართველოს პრეზიდენტის და საქართველოს ხელისუფლების მხარდამჭერ განცხადებებს უკრაინის მიმართ.

განცხადების ავტორები საქართველოს ულოცავენ ევროკავშირის წევრობაზე განაცხადის შეტანას და მზადყოფნას გამოთქვამენ, გააგრძელონ საქართველო-აშშ-ს შორის ორმხრივი პარტნიორობისა და ტრანსატლანტიკური კავშირების გაძლიერება.

"ვულოცავთ საქართველოს ევროკავშირში წევრობაზე განაცხადის შეტანას და მოუთმენლად ველით შევიტანოთ ჩვენი წვლილი საქართველოსა და აშშ-ს შორის ორმხრივი პარტნიორობისა და ტრანსატლანტიკური კავშირების გაღრმავებაში."- აღნიშნულია განცხადებაში.

აღსანიშნავია,რომ აშშ-ის ჰელსინკის კომისიის განცხადებაში საქართველოსთან ერთად, ასევე საუბარია ბალტიის ზღვის ქვეყნების, პოლონეთის, რუმინეთის, თურქეთისა და მოლდოვას მიერ უკრაინის წინააღმდეგ რუსეთის მიერ განხორციელებული აგრესიის საპასუხოდ გაწეულ ძალისხმევაზე.