Apple-მა კარტოგრაფიულ სერვისზე, Apple Maps-ზე რუსეთის თავდაცვის სამინისტროს სახელი გადაარქვა და "რუსეთის ფედერაციის ფაშიზმის სამინისტროთი" ჩაანაცვლა.

თავდაცვის სამინისტროს ახალი დასახელება ჩანს როგორც რუსულ, ასევე ინგლისურ ენებზე. VPN სერვისების გამოყენებისას სახელი არ იცვლება. Google Maps-ში რუსეთის თავდაცვის სამინისტროს სახელი უცვლელი რჩება.

Apple-ის ამ ნაბიჯმა რუსეთის განრისხება გამოიწვია. რუსული სახელმწიფო მედიის ცნობით, მარეგულირებელმა ორგანომ "როსკომნადზორმა" წერილი გაუგზავნა Apple-ის ადმინისტრაციას და სამინისტროს პირვანდელი სახელწოდების აღდგენა მოსთხოვა.

"როსკომნადზორი" Apple-ს, მოთხოვნის შეუსრულებლობის შემთხვევაში, მისი წლიური ბრუნვის დაახლოებით 1/20-ით დაჯარიმებით დაემუქრა.

სააგენტო "ტასის" ცნობით, 4 მარტის ღამის მდგომარეობით, რუსეთის ტერიტორიაზე სამინისტროს სახელი "ასახულია სწორად", მაგრამ სხვა ქვეყნებში კვლავ "ფაშიზმის სამინისტრო" რჩება.

ამ დროისთვის, საქართველოს ტერიტორიიდან უწყების დასახელება მითითებულია, როგორც "რუსეთის ფედერაციის თავდაცვის სამინისტრო".

უკრაინაში შეჭრის გამო რუსეთის წინააღმდეგ დაწესებული სანქციების გამო, Apple-მა რუსეთში საქმიანობა შეწყვიტა.