ყველა მისი გამონათქვამი ანტისახელმწიფოებრივია, ასე აფასებს პრემიერ-მინისტრის განცხადებებს "ნაციონალური მოძრაობის" წევრი რომან გოცირიძე. მისი თქმით, ის რასაც დღეს ხელისუფლება და უმრავლესობა აკეთებს არის ბიძინა ივანიშვილის მიერ გასახმოვანებლად დავალებული პოზიცია.
"მინდა, ჩემი გამოსვლა დავიწყო ერთი ციტატით და კარგად მოუსმინეთ. აბა, თუ გამოიცნობთ, ვინ თქვა ეს: „უკრაინაში ომის შემჩერებელი დღეს არავინ არის. პირდაპირ ვთქვათ, რომ სანქციები არ არის ეფექტური საშუალება“. ნებისმიერი საღად მოაზროვნე ადამიანი იტყოდა, რომ ეს სიტყვები ეკუთვნის ლავროვს, პუტინს, ან ბელარუსიის პრეზიდენტს. სინამდვილეში ეს არის თქვენი პოზიცია, ეს არის საქართველოს მთავრობის თავმჯდომარის პოზიცია. ეს არის ბიძინა ივანიშვილის მიერ თქვენდამი გასახმოვანებლად დავალებული პოზიცია. რას ნიშნავს უკრაინაში ომს ვერავინ შეაჩერებს? ანუ კაპიტულანტური პოზიცია დაიჭიროს მთელმა მსოფლიომ და ევროპამ? რას ნიშნავს, რომ სანქციები არაფერია.
დამთავრდა რუსეთი. კეთროვანი, გარიყული სახელმწიფოა და ხელს არავინ ართმევს. თქვენ ხელსაც ართმევთ და ეხუტებით. არავინ ეთამაშება სპორტში, არც ჭადრაკს, არც ფეხბურთს და არც მათ საყვარელ თამაშს ჰოკეის. გააგდეს ყველა შესაძლო ინსტიტუტებიდან. რუსეთი იზოლირებული ხდება, ცივილიზებული სამყაროსთვის მიუღებელი სახელმწიფო. თქვენთვის არის ერთადერთი მისაღები. რატომ გაიწვია უკრაინამ საქართველოდან ელჩი? ეს ხომ წარმოუდგენელი რამ ხდება. ქვეყანა, რომელსაც გვინდა ევროატლანტიკური ინტეგრაციის პროცესის დაჩქარება, ამ ექსტრემალურ ვითარებაში მყოფი პრეზიდენტი ორი ქვეყნიდან იწვევს ელჩს და რა ფორმულირებით?! ყირგიზეთის პრეზიდენტმა დაურეკა პუტინს და თანაგრძნობა გამოუცხადა, საქართველომ ყველა საშუალება დაბლოკა უკრაინასთან კონტაქტის, თვითმფრინავებს არ უშვებს და ემბარგო გამოუცხადა, ფაქტობრივად, სანქცია დაუწესა უკრაინას ფრენებში და არა რუსეთს. ფორმულირება იყო „საქართველოს ხელისუფლების ამორალური პოზიცია სანქციებთან დაკავშირებით“ - ამაზე მეტი თავს ლაფის დასხმა რაღა გინდათ. ვიცი, თქვენს გულში ახლა რა ტრიალებს, თუ რაიმე წესიერების ნატამალი დაგრჩათ. ეს ხომ წარმოუდგენელია, ამორალური გიწოდათ მთელს ხელისუფლებას. ამორალურ საქციელს როდესაც ამბობს, ამორალური ადამიანები იქცევიან ამორალურად.
რაც შეეხება ამ ანტივაქსერ პრემიერს. ყველა მისი გამონათქვამი ანტისახელმწიფოებრივია, ბრალი მიუძღვის ათასობით ადამიანის სიკვდილში, ხალხმა აცრა შეწყვიტა. მან განაცხადა, როგორც სანქციები არ მუშაობს, ასევე თქვა, რომ აზრი არ აქვს „ბუსტერი“ არ მუშაობს. კი მაგრამ, თუ „ბუსტერი“ არ მუშაობს, 100 ლარს უმატებთ თითოეულ „ბუსტეზე“, 20 მლნ დაიხარჯა წინა ბიუჯეტში. თუ „ბუსტერი“ უაზრობაა, ფულს რატომ ფლანგავთ? თუ „ბუსტერი“ აზრიანია, ეს უაზრო პრემიერი რატომ გიზით ხელმძღვანელად“,- აღნიშნავს გოცირიძე.
