უკრაინის პრეზიდენტმა უკრაინის ელჩი ქვეყნიდან, თქვენი მოღალატეობრივი ქმედებების გამო გაიწვია, აცხადებს "ნაციონალური მოძრაობის“ დეპუტატი ანა წითლიძე. მისი განმარტებით, უკრაინელმა ხალხმა ნამდვილად იცის მთავარი, რაც თქვა ზელენსკიმ, ქართველი ხალხი სჯობს ხელისუფლებას.
"ვცდილობ და არ ვიზამ იმას, რომ თქვენგან განსხვავებით შეურაცხყოფა მოგაყენოთ, მაგრამ ის, რაც ბატონმა ყაველაშვილმა გააკეთა, პირველ რიგში, აგინა საკუთარ თავს და მამა-მარჩენალს, ყველაზე მთავარ პრორუსს ამ ქვეყანაში ბიძინა ივანიშვილს. მე გისმენდით დიდი ხნის განმავლობაში და განსაკუთრებით თქვენს რუპორებს, კობახიძე-მდინარაძეს მინდა მივმართო: ვინ ხართ და როგორ ბედავთ რომ ჩემს თაობას, 90- იანი წლების თაობას, რომლებიც გავიზარდეთ რუსული ტანკებისა და ტყვიების ზუზუნის ფონზე საოკუპაციო ზოლთან სამეგრელოში, ვინც არ უნდა ყოფილიყო ხელისუფლებაში გაბედოთ და დააბრალოთ რომ ომი დაიწყო საქართველომ? თქვენ საერთოდ როგორ ბედავთ, რომ ამ უმძიმეს ჟამს ჩვენი მეგობარი უკრაინისა და საქართველოსთვის კითხვის ნიშნის ქვეშ დააყენოთ ქვეყნის ევროატლანტიკური მომავალი, ევროატლანტიკური კურსი, რომელიც საუკუნეების განმავლობაში სისხლით მოვიპოვეთ. როგორ ბედავთ, რომ დღევანდელი პარლამენტის სხდომა თქვენი ვიწროპარტიული ინტერესებისთვის, ისევ „ქოცურ-ნაცურ“ დაპირისპირებაში გადაიყვანეთ. მართლა არ ვიცი საიდან მოხვედით, რა ხალხი ხართ, რად გიღირთ ეს პოლიტიკური დივიდენდები, ხელფასი, ან სკამი რად გიღირთ, რას ეუბნებით საკუთარ შვილებს და საერთოდ რა გინდათ ამ ქვეყნისგან? მაგრამ ვიცი ერთი, რომ ყველა მოღალატის ქვეშ აუცილებლდ უნდა იწვოდეს მიწა. თქვენს უტიფრობას საზღვარი არ აქვს. რაც თქვენ იკადრეთ პარლამენტის სხდომის ვიწროპარტიულ ჭრილში გადაყვანა, ამას აუცილებლად შეაფასებს ისტორია და უნდა იცოდეთ, რომ თქვენს მოღალატეობრივ პოზიციაზე პასუხი მხოლოდ თქვენ კი არა, მთელ თქვენს შთამომავლობას მძიმე ტვირთად დაეკისრება. ეს ქვეყანა აუცილებლად იქნება თავისუფალი, ერთიანი და ევროპული. უკრაინელმა ხალხმა ნამდვილად იცის მთავარი, რაც თქვა ზელენსკიმ, ქართველი ხალხი სჯობს ხელისუფლებას და თქვენ არ გამოხატავთ ქართველი ხალხის ინტერესებს“, - განაცხადა ანა წითლიძემ.
