ექვთიმე თაყაიშვილის სახელობის საქველმოქმედო ფონდი 2003 წლის მაისში ბიზნესმენ ზაზა სიორიძის ინიციატივით დაფუძდა. ამავე წელსვე პატრიარქის ლოცვა-კურთხევითა და ფონდის თაოსნობით თბილისში, ვაშლოვანის ქუჩის #6-ში, სადაც დიდმა მამულიშვილმა სიცოცხლის უკანასკნელი წლები გაატარა, წმ. ექვთიმე ღვთისკაცის ბინა-სამლოცველო გაიხსნა.

ფონდის საქმიანობიდან აღსანიშნავია უკვე განხორციელებული პროექტები, მათ შორის:

- ფონდმა დააარსა ექვთიმე თაყაიშვილის სახელობის სტიპენდია თბილისის სახელმწიფო უნივერსიტეტისა და სასულიერო აკადემიის წარჩინებული სტუდენტებისათვის 2003 წლიდან.

- ფონდის ფინანსური მხარდაჭერით ხორციელდება "ილია ჭავჭავაძის პერსონალური ენციკლოპედიის" შექმნა და ფუნქციონირება დაიწყო ილია ჭავჭავაძის კვლევის ცენტრმა. 2007 წ.

- ფონდის ფინანსური მხარდაჭერით მომზადდა და განხორციელდა ამირან არაბულისა და ეთერ თათარაიძის პროექტი "შენდობით მომიხსენიე".

- ფონდმა გამოსცა გურამ შარაძის წიგნი "... ასე იწყებოდა წმ. ექვთიმე ღვთისკაცი-თაყაიშვილი." ასევე, დურმიშხან ცინცაძის წიგნი `ექვთიმე თაყაიშვილის ნაკვალევზე." 2005-2009 წ. წ.

- გამოიცა ექვთიმე თაყაიშვილის "ბიბლიოგრაფია". 2010"

ამჟამად, ექვთიმე თაყაიშვილის საქველმოქმედო ფონდის მეშვებით ექვთიმე თაყაიშვილის მუზეუმის მშენებლობის დასრულება დიდი ქართველი ერისკაცის ღვაწლის მორიგ წარმოჩენასა და დაფასებას წარმოადგენს.

ქართველი ისტორიკოსი, არქეოლოგი და საზოგადო მოღვაწე, საქართველოს მეცნიერებათა აკადემიის აკადემიკოსი (1946), პროფესორი (1918), თბილისის სახელმწიფო უნივერსიტეტის ერთ-ერთი დამფუძნებელი ექვთიმე თაყაიშვილი (წმინდა ექვთიმე ღვთისკაცი) 1863 წლის 3 იანვარს (სხვა ვერსიით 5 ივნისი) ოზურგეთში დაიბადა. ექვთიმე თაყაიშვილი იყო საქართველოს ეროვნულ-დემოკრატიული პარტიის ერთ-ერთი ფუძემდებელი. 1919-1921 წლებში იგი გახლდათ საქართველოს დემოკრატიული რესპუბლიკის დამფუძნებელი კრების თავმჯდომარის მოადგილე. 1921 წლის საქართველოს გასაბჭოების შემდეგ, ექვთიმე თაყაიშვილი საქართველოს რესპუბლიკის მთავრობას ემიგრაციაში საფრანგეთში გაყვა, სადაც შეძლო ქართული ეროვნული საგანძურის დაცვა და გადარჩენა. 1945 წელს საქართველოში დაბრუნების შემდგომ საქმიანობა თბილისის სახელმწიფო უნივერსიტეტში განაგრძო. იგი 1953 წლის 21 თებერვალს, უკიდურეს გაჭირვებაში გარდაიცვალა. მის დაკრძალვას ვაკის სასაფლაოზე მხოლოდ ორმოცამდე ადამიანი დაესწრო. 1985 წელს რეჟისორმა რეზო თაბუკაშვილმა ექვთიმე თაყაიშვილის შესახებ დოკუმენტური ფილმი გადაიღო. დიდი მეცნიერი ამჟამად გადასვენებულია საზოგადო მოღვაწეთა მთაწმინდის პანთეონში. 2002 წლის 17 ოქტომბერს საქართველოს მართლმადიდებელმა სამოციქულო ეკლესიამ ექვთიმე თაყაიშვილი წმიდანად შერაცხა.

ოზურგეთის რაიონის სოფელ ლიხაურში ექვთიმე თაყაიშვილის მუზეუმის საზეიმო გახსნის ცერემონიალი 16:00 საათზე დაიწყება.