27 თებერვალს, რუსეთ-საქართველოს რაგბის მატჩის დროს რუსეთის სახელმწიფო ჰიმნს უკრაინისა და საქართველოს დროშებით ვუპასუხებთ, - აცხადებს "ევროპული საქართველოს" წევრი გიორგი ნონიაშვილი.
მისი განცხადებით, "ევროპული საქართველო" დინამოს სტადიონის შესასვლელებთან ყველა მსურველი გულშემატკივრისთვის დაარიგებს საქართველოსა და უკრაინის დროშებს.
"კვირას, 27 თებერვალს, 18:00 საათზე საქართველოსა და რუსეთის სარაგბო მატჩი გაიმართება. იმ პირობებში, როდესაც ჩვენი სამარცხვინო ხელისუფლება ჩაწოლილი და ცდილობს საკუთარი ქვეყნის სუვერენიტეტსა და მოძმე ქვეყნის, უკრაინის სუვერენიტეტზე ხმამაღლა არ ილაპარაკოს, საკუთარი ქვეყნის ეროვნულ ინტერესებს არ ემსახუროს, იმ პირობებში, როდესაც რუსეთის აგრესია იზრდება ყოველდღიურად და მთელი ცივილიზებული მსოფლიო ცდილობს მის შეჩერებას, იმ პირობებში, როდესაც ჩვენი მოძმე ქვეყანა, უკრაინა მძიმე განსაცდელშია, რომელთან ერთადაც ერთი ბედისწერა გვაქვს, ერთი მომავალი და საერთო მტერი, ჩვენ გადავწყვიტოთ ვუპასუხოთ რუსეთის აგრესიას, რუსეთის ქმედებებს მკაფიოდ და გთავაზობთ, რომ ყველამ ერთად მატჩზე ავაფრიალოთ საქართველოსა და უკრაინის დროშები, განსაკუთრებით რუსეთის ჰიმნის დროს. ასე შეგვიძლია ცივილიზებულად გამოვხატოთ ჩვენი სოლიდარობა უკრაინელი ხალხის მიმართ, მაშინ როდესაც ადგილობრივი და საერთაშორისო მედიების ყურადღება იქნება ამ სპორტული ღონისძიებისადმი. ეს იქნება მკაფიო სიგნალი, მაშინ როცა ჩვენი ხელისუფლება მერყეობს და ჩაწოლილია საგარეო პოლიტიკის ნაწილში. ამავდროულად შემიძლია გითხრათ, რომ „ევროპული საქართველო“ დინამოს სტადიონის შესასვლელებთან ყველა მსურველი გულშემატკივრისთვის დაარიგებს საქართველოსა და უკრაინის დროშებს. მოგიწოდებთ, რომ ერთად გამოვხატოთ ეს სოლიდარობა", - განაცხადა ნონიაშვილმა.
ამავდროულად, გიორგი ნონიაშვილმა უპასუხა ჟურნალისტის მიერ დასმულ შეკითხვას, რომლის მიხედვითაც ანალიტიკოსმა ზურაბ ქადაგიძემ დაგეგმილ აქცია-პერფორმანსს პროვოკაციული უწოდა.
"მე მგონია, რომ ადამიანი რომელიც პროვოკაციას უწოდებს საკუთარ ქვეყანაში, საკუთარი დროშის დაჭერასა და ფრიალს, მითუმეტეს სპორტულ ღონისძიებაზე, ამავდროულად საკუთარი მოძმე ქვეყნის მიმართ, საკუთარი ძმის მიმართ სოლიდარობის გამოცხადებას პროვოკაციას უწოდებს, არანაირი კავშირი არ აქვს არც ადამიანობასთან, არც ქართველობასთან და არც ქართულ მორალთან. მე პასუხისმგებელი ვარ ჩემი პარტიის ღონისძიებაზე. ჩვენ ვცდილობთ, რომ ყველა ჩვენი ღონისძიება იყოს ცივილურ ფორმებში ჩაჯენილი. შესაბამისად მე ვერ ვისაუბრებ სხვა პოლიტიკური პარტიები რას დააპირებენ ზოგადად საკუთარი ღონისძიებების ფარგლებში ან დღეს ან ხვან ან ერთი თვის შემდეგ, ამაზე პასუხს ვერ გაგცემთ", - თქვა ნონიაშვილმა.
