2022 წლის 10 თებერვალს, საქართველოს ელჩმა, ვახტანგ მახარობლიშვილმა ლუქსემბურგის დიდ ჰერცოგს რწმუნებათა სიგელები გადასცა. სიგელების გადაცემის საზეიმო ცერემონია ლუქსემბურგში, დიდი ჰერცოგის სასახლეში გაიმართა.
რწმუნებათა სიგელების გადაცემის ცერემონიის შემდეგ, ლუქსემბურგის დიდ ჰერცოგსა და საქართველოს ელჩს შორის შეხვედრა შედგა. აუდიენციის ფარგლებში მხარეებმა ხაზი გაუსვეს საქართველოსა და ლუქსემბურგის დიდ საჰერცოგოს შორის არსებულ მეგობრულ ურთიერთობებსა და ნაყოფიერ თანამშრომლობას როგორც ორმხრივ, ისე მრავალმხრივ ფორმატებში.
საქართველოს ელჩმა და ლუქსემბურგის დიდმა ჰერცოგმა ასევე ისაუბრეს ორ ქვეყანას შორის სავაჭრო ურთიერთობების გაღრმავების მნიშვნელობაზე. ამასთან, ორმხრივ ეკონომიკურ თანამშრომლობაზე საუბრისას, განსაკუთრებული ყურადღება გამახვილდა ფინანსურ სექტორსა და ლოგისტიკის სფეროში გამოცდილების გაზიარების მნიშვნელობასა და თანამშრომლობის კიდევ უფრო გაღრმავების პერსპექტივებზე.
მხარეებმა ასევე აღნიშნეს რეგიონში უსაფრთხოების კუთხით არსებული გამოწვევები, სამხრეთ კავკასიაში და შავი ზღვის რეგიონში არსებული ვითარება. ამასთან, ვახტანგ მახარობლიშვილმა ისაუბრა საქართველოს ოკუპირებულ ტერიტორიებზე არსებულ მძიმე ჰუმანიტარულ ვითარებაზე. აღნიშნულ კონტექსტში, საქართველოს ელჩმა ლუქსემბურგის დიდ ჰერცოგს მადლობა გადაუხადა საქართველოს ტერიტორიული მთლიანობისა და სუვერენიტეტის ურყევი მხარდაჭერისთვის.
შეხვედრის დასასრულს ლუქსემბურგის დიდმა ჰერცოგმა ელჩს წარმატებები უსურვა მის მომავალ საქმიანობაში.