"თავისუფალი დემოკრატები" კალმახელიძის უწყებას ევროსაბჭოს წამების საწინააღმდეგო კომიტეტის მიერ მისთვის მიცემული ორმოცამდე რეკომენდაციის შესრულებისკენ მოუწოდებენ.
"თავისუფალი დემოკრატები" კიდევ ერთხელ გამოთქვამენ შეშფოთებას ხელისუფლების იმ უკვე მრავალწლიანი პოლიტიკის გამო, რომელიც ციხეების მიზანმიმართულ ავსებაში გამოიხატება. მათ მიაჩნიათ, რომ ხელისუფლებას არ აქვს სისხლის სამართლებრივი პოლიტიკა, რის გამოც სასამართლოები პრაქტიკაში ავტომატურად ახორციელებენ ქვეყნის პრეზიდენტის მოწოდებას "ყველა ციხეში"-ს შესახებ. ხელისუფლება არ ისახავს მიზნად პატიმართა რესოციალიზაციას და უარს ამბობს გაათვითცნობიეროს ის ფაქტი, რომ ციხეში წლობით უსაქმოდ გამოკეტილი მსჯავრდებული საზოგადოებისთვის კიდევ უფრო საშიში შეიძლება გახდეს", - ნათქვამია ირაკლი ალასანიას პარტიის განცხადებაში.
აღნიშნულ კონტექსტში, "თავისუფალი დემოკრატები" კალმახელიძის უწყებას მოიწოდებენ, ევროსაბჭოს მიერ დადგენილ ვადაში შეასრულოს მისი უწყებისთვის მიცემული რეკომენდაციები და საზოგადოებისათვის გამჭვირვალე გახადოს ეს პროცესი.
"თავისუფალი დემოკრატები" აგრეთვე მოუწოდებენ არასამთავრობო სექტორის შესაბამის წარმომადგენლებს, განახორციელონ კონტროლი კალმახელიძის უწყების მიერ ევროსაბჭოს რეკომენდაციების შესრულებაზე.
შეგახსენებთ, რომ მიმდინარე წლის ოქტომბერში, ევროსაბჭოს წამების საწინააღმდეგო კომიტეტმა საქართველოს ციხეების შესახებ ივლისში მიღებული დასკვნა გამოაქვეყნა, რომელშიც სასჯელაღსრულების სამინისტროს ორმოცამდე რეკომენდაცია მისცა და დაუდგინა ექვსთვიანი ვადა მათი შესრულებისთვის ნაბიჯების გადასადგმელად.
აღსანიშნავია, რომ წამების საწინააღმდეგო კომიტეტის მიერ შესწავლილ ციხეებთაგან, ყველაზე მძიმე მდგომარეობა ქსნის მე-7 დაწესებულებასა და გეგუთის ციხეშია. რეკომენდაციებს შორისაა, პაემნების დროს უშუალო კონტაქტის უზრუნველყოფა და გამყოფი მინების ხმარებიდან ამოღება, ქსნის საპატიმროში ენით აუწერელი ანტისანიტარიის აღმოფხვრა, გლდანის ციხეში 1მ ხ 1,5 მ მოცულობის ბოქსების საპატიმრო საკნად გამოყენების აკრძალვა, გეგუთის ციხისკენ მიმავალი გზის დაგება, გეგუთის ციხეში თითოეული პატიმრისთვს საკუთარი საწოლის მიჩენა, ყველა პატიმრისთვის 8 საათი ან მეტი საკნის გარეთ გატარების უზრუნველყოფა, ერთსაათიანი გასეირნების უზრუნველყოფა, გლდანის ციხის ყველა საკანში ტელევიზორის ქონისთვის ნებართვის მიცემა, ახალ პატიმართა სისტემატური შემოწმება გადამდებ დაავადებებზე, ამ შემოწმებების ჩატარება ბადრაგთა და უცხო პირთა ყურთასმენისა და თვალთახედვს მიღმა. რეკომენდაციებს შორისა აგრეთვე თითო პატიმარზე მინიმუმ 4 კვ.მ. საცხოვრებელი ფართის გამოყოფა ყველა ციხეში.
გარდა ამისა, წამების საწინააღმდეგო კომიტეტმა ისიც შენიშნა, რომ საქართველოში პატიმრების რიცხვი საერთაშორისო სტანდარტს ბევრად აღემატება და დღეს, ყოველ 100 000 ქართველში 500 პატიმარია, მაშინ როცა საერთაშორისო საშუალო სტანდარტი 100 000 კაცზე 150 პატიმრით შემოიფარგლება.
