პარლამენტის საპროცედურო საკითხთა კომიტეტის თავმჯდომარე, ირაკლი ქადაგიშვილი ევროპარლამენტარების მიერ გავრცელებულ განცხადებას ეხმიანება, სადაც ისინი საქართველოში დაგეგმილი ვიზიტის გაუქმებას იუწყებიან.
ქადაგიშვილის განცხადებით, ევროპარლამენტართა მიერ პარლამენტის თავმჯდომარის ასე აბუჩად მოხსენიება, რომ მან დრო ვერ მონახა და ვერ მოიცალა, არ არის კორექტული.
"როდესაც ორი დღით ადრე ეუბნები პარლამენტის თავმჯდომარეს, აი, ახლა ჩამოვდივარ და რაღაც ფორმატს ვიწყებთ, ამ დროს კი ეს ფორმატი სულ სხვა რეჟიმში უნდა შეთანხმდეს, ეს არ არის კორექტული დამოკიდებულება. აქედან გამომდინარე, ჩვენ ყველა ფორმატში ვთანამშრომლობთ ევროპარლამენტთან და ამ ფორმატშიც გავაგრძელებთ თანამშრომლობას, ოღონდ ამ ფორმატისთვის დამახასიათებელი წესის მიხედვით", - აცხადებს ქადაგიშვილი.
შეგახსენებთ, ევროპარლამენტარებმა ვიოლა ფონ კრამონმა, მირიამ ლექსმანმა და მარინა კალიურანდმა გაავრცელეს განცხადება, სადაც ნათქვამია, რომ პარლამენტის თავმჯდომარემ დრო ვერ გამონახა, რის გამო ჟან მონეს დიალოგის ფარგლებში დაგეგმილი ვიზიტი გაუქმდა.
ევროპარლამენტარების განცხადებას საქართველოს პარლამენტის თავმჯდომარის კაბინეტი განცხადებით გამოეხმაურა.
კაბინეტის განცხადებით, სასურველია, ევროპარლამენტის შესაბამისმა სამსახურებმა სრულად გაასაჯაროონ საქართველოს პარლამენტის კაბინეტთან წარმართული კომუნიკაცია ჟან მონეს დიალოგის მოსამზადებელ ვიზიტთან დაკავშირებით.
