ბალტიის ზღვაში რუსეთის სამხედრო აქტივობის ფონზე, შვედეთმა კუნძულ გოტლანდზე სამხედრო ძალების რაოდენობა გაზარდა. ინფორმაციას ადასტურებს შვედეთის თავდაცვის მინისტრი პიტერ ჰულტკვისტი.

მანამდე, შვედეთის საზოგადოებრივმა მაუწყებელმა გაავრცელა კადრები, სადაც ჩანს კუნძულზე დამატებითი სამხედრო ძალებისა და აღჭურვილობის, მათ შორის ჯავშანტრანსპორტიორების გაგზავნა.

როგორც იუწყებოდნენ, სამხედრო ტექნიკა კუნძულზე ბორნით გადაიტანეს და განათავსეს ადმინისტრაციულ ცენტრ ვისბიში. 

"შეიარაღებული ძალები იღებენ აუცილებელ ზომებს შვედეთის ერთიანობის შესანარჩუნებლად და მისი თავდაცვის უნარის დემონსტრირებისთვის", - განაცხადა თავდაცვის მინისტრმა.

თავდაცვის უწყების ინფორმაციით, გაძლიერდება პატრულირება კუნძულის ტერიტორიაზე, ადგილობრივ აეროპორტსა და პორტებში.

მანამდე, შვედეთი ბალტიის ზღვაში რუსეთის სამხედრო აქტივობის ზრდის შესახებ იუწყებოდა. პარალელურად, დანიური მედიის ინფორმაციით, ბალტიის ზღვაში რუსეთის საზღვაო ძალების სამი სადესანტო ხომალდი შევიდა.

2014 წელს რუსეთის მიერ ყირიმის ანექსიის შემდეგ, შვედეთმა თავდაცვა გააძლიერა, 2017 წლიდან კი კვლავ განაახლა სამხედრო გაწვევა. 

გოტლანდი ბალტიის ზღვის უდიდესი კუნძულია, რომელიც შვედეთს ეკუთვნის. კუნძული რუსეთის კალინინგრადის ოლქიდან დაახლოებით 300 კილომეტრში მდებარეობს.