ნატო-ს 30-ვე ქვეყანა ერთიანია რუსეთის მიერ უკრაინაში მოსალოდნელი სამხედრო ქმედებების წინააღმდეგ. ნათქვამია ნატო-ში შეერთებული შტატების მისიის განცხადებაში, რომელიც ჩრდილოატლანტიკური საბჭოს შეხვედრის დასრულების შემდეგ გავრცელდა.
"ნატოს წევრი ქვეყნების საგარეო საქმეთა მინისტრებმა, დღევანდელ საგანგებო შეხვედრაზე, კიდევ ერთხელ დაადასტურეს თავიანთი ერთიანობა უკრაინის წინააღმდეგ რუსეთის აგრესიის საპასუხოდ", - ნათქვამია მისიის განცხადებაში.
"ნატო-რუსეთის საბჭოს მოახლოებული სხდომის წინ, მინისტრებმა ხაზი გაუსვეს დიპლომატიის, დიალოგისა და დეესკალაციის აუცილებლობას", - აღნიშნულია განცხადებაში.
შეხვედრის შემდეგ კომენტარი გააკეთა ლატვიის საგარეო საქმეთა მინისტრმა, ედგარ რინკევიჩმა.
"ნატოს ქვეყნები მზად არიან ,მომავალ კვირას რუსეთთან ერთად იმსჯელონ ევროპის უსაფრთხოების შესახებ, მაგრამ უარს არ იტყვიან თავიანთ პრინციპებსა და ღირებულებებზე", - თქვა რინკევიჩმა.
"ნატოს საგარეო საქმეთა მინისტრების შეხვედრამ კარგად ჩაიარა. მოკავშირეთა ერთიანობა, ეფექტური კოლექტიური თავდაცვა და ჩვენი პარტნიორების მხარდაჭერა რუსეთის აგრესიული ქცევის წინააღმდეგ ბრძოლის მთავარი ელემენტებია, - დაწერა რინკევიჩმა ტვიტერზე, - ჩვენ მზად ვართ რუსეთთან დიალოგისთვის, მაგრამ არა ჩვენი ღირებულებების და ძირითადი პრინციპების საზიანონოდ".
შეგახსენებთ, ბრიუსელში, საგარეო საქმეთა მინისტრების დონეზე, ჩრდილოატლანტიკური საბჭოს საგანგებო შეხვედრა გაიმართა, სადაც ევროპის უსაფრთხოებისა და რუსეთ-უკრაინის საკითხებზე იმსჯელეს.
უკრაინის საზღვრებთან რუსეთის სამხედრო ძალების გაძლიერების გამო შეშფოთების ფონზე, აშშ-ისა და რუსეთის ოფიციალური პირები 10 იანვარს ჟენევაში უსაფრთხოების საკითხებზე მოლაპარაკებებს გამართავენ.
12 იანვარს ბრიუსელში გაიმართება ნატო-რუსეთის საბჭოს სხდომა. 13 იანვარს ევროპის უსაფრთხოების საკითხებზე მოლაპარაკებები გაგრძელდება ეუთო-ს ფორმატში.