პარტია "საქართველოსთვის" სააკაშვილის საქმეზე დროებითი საგამოძიებო კომისიის შექმნას მხარს არ დაუჭერს. ამის შესახებ პარლამენტარმა ანა ბუჩუკურმა განაცხადა.
მისი თქმით, მაშინ როდესაც "ქართული ოცნება" და "ნაციონალური მოძრაობა" ერთმანეთს ასულდგმულებენ, საგამოძიებო კომისიის შექმნა სწორი არ არის და მხარს ვერ დაუჭერენ.
"ჩვენ დიდი ხანია, ვამბობთ და გავიმეორებ, ამ შემთხვევაში,"ქართული ოცნება" და "ნაციონალური მოძრაობა" არის ერთი ჯოხის ორი ბოლო. „ქართული ოცნება“, ძალაუფლების შესანარჩუნებლად და ვიწროპარტიული ინტერესებისთვის მზად არის, გააუქმოს და გაანადგუროს დამოუკიდებელი სახელმწიფო ინსტიტუტი. და მეორე ამ შემთხვევაში, "ნაციონალური მოძრაობა" სამწუხაროდ, მზად არის, ვიწროპარტიული ინტერესი, ანუ ერთი ადამიანის ინტერესი სახელმწიფოს ინტერესში გაცვალოს", - თქვა ბუჩუკურმა.
გუშინ, ცნობილი გახდა, რომ მიხეილ სააკაშვილს სურს მის საქმესთან დაკავშირებით, პარლამენტში დროებითი საგამოძიებო კომისია შეიქმნას.
სააკაშვილის თქმით, ამ კომისიამ უნდა შეისწავლოს გლდანის პენიტენციურ დაწესებულებაში მის მიმართ არაადამიანური მოპყრობის ფაქტები და შესაბამისი თანამდებობის პირების პასუხისმგებლობის საკითხიც დააყენოს.
"ნაციონალური მოძრაობამ" განაცხადა, რომ ბოიკოტს შეწყვეტს და პარლამენტს დაუბრუნდება იმ შემთხვევაში, თუ მიხეილ სააკაშვილის საქმესთან დაკავშირებით საგამოძიებო კომისია შეიქმნება.
